گلوکارہ حمیرا ارشد نے معروف اداکار و گلوکار فواد خان کی پاکستان آئیڈل میں جج کے طور پر شمولیت پر تنقید کرتے ہوئے کہا ہے کہ اس شو میں ایسے لوگ ججز بنائے گئے ہیں جن کا موسیقی سے کوئی تعلق ہی نہیں۔
حمیرا ارشد نے ایک پروگرام میں انٹرویو دیتے ہوئے کہا کہ یہ پہلا موقع نہیں جب موسیقی سے نابلد فنکار ججز بنے ہیں، ایسے لوگوں کو خود شرم آنی چاہیے، اگر ہمارا موسیقی سے کوئی تعلق نہیں تو ہمیں ایسے پروگرامز میں جج بننے کا حق نہیں۔
حمیرا ارشد نے کہا کہ اگرچہ اسپانسرز کی پسند کو مدِنظر رکھتے ہوئے مشہور چہروں کو شامل کیا جاتا ہے، مگر انہیں خود سمجھنا چاہیے کہ وہ موسیقی کے معیار پر فیصلہ کرنے کے اہل نہیں۔ ہاں، بطور سلیبرٹی بیٹھ سکتے ہیں، مگر جج بننا غلط ہے۔
انہوں نے اس صورتحال کو پروگرام کا مذاق قرار دیتے ہوئے کہا کہ اگر کوئی امیدوار جج سے کہے کہ آپ خود گا کر دکھائیں، تو کیا جج سیکھنے کے لیے دو مہینے بعد واپس آئے گا؟
حمیرا ارشد نے کہا کہ ایک موقع پر ایک پارٹیسپینٹ نے بری طرح گایا، مگر جج رو رہا تھا، ایسے شو میں ججز وہ ہونے چاہییں جنہوں نے اپنی زندگی موسیقی کے لیے وقف کر دی ہو۔
