بولی وُڈ اداکار سلمان خان کے بیان پر سوشل میڈیا پر ہنگامہ — بلوچستان کو الگ خطہ قرار دینے پر پاکستانی صارفین برہم
بولی وُڈ اسٹار سلمان خان کو سعودی عرب کے شہر ریاض میں منعقدہ بڑے تفریحی ایونٹ ’جوائے فورم‘ کے دوران بلوچستان سے متعلق متنازع بیان دینے پر سوشل میڈیا پر شدید تنقید کا سامنا ہے۔
گزشتہ دنوں سلمان خان نے شاہ رخ خان اور عامر خان کے ساتھ ریاض میں ہونے والے اس فورم میں شرکت کی، جو سعودی عرب کے ’وژن 2030‘ کے تحت منعقد ہونے والا ایک بین الاقوامی تفریحی میلہ ہے، جس میں دنیا بھر کی فلم، موسیقی اور گیمنگ انڈسٹری سے وابستہ نامور شخصیات شریک ہوتی ہیں۔
تقریب کے دوران سلمان خان نے بھارتی فلم انڈسٹری کی مشرقِ وسطیٰ میں بڑھتی مقبولیت پر بات کرتے ہوئے کہا کہ اگر یہاں کوئی بولی وُڈ، تمل، تیلگو یا ملیالم فلم ریلیز کی جائے تو وہ فوراً سپر ہٹ ثابت ہوتی ہے کیونکہ مختلف ممالک کے لوگ یہاں کام کرنے آتے ہیں۔
اسی گفتگو میں اداکار نے کہا،
“یہاں بلوچستان سے لوگ ہیں، افغانستان سے لوگ ہیں، پاکستان سے لوگ ہیں، سب یہاں کام کر رہے ہیں۔”
سلمان خان کی جانب سے بلوچستان کو پاکستان سے الگ بیان کرنے پر پاکستانی سوشل میڈیا صارفین نے سخت ردِعمل دیا، اسے پاکستان کی علاقائی سالمیت پر حملہ قرار دیا۔
صارفین کا کہنا تھا کہ بلوچستان پاکستان کا ایک صوبہ ہے جو پہلے ہی بھارتی حمایت یافتہ دہشت گردی کا نشانہ بن رہا ہے۔
ایک صارف نے طنز کرتے ہوئے کہا،
“سلمان خان شاید اب جیوپولیٹکس کھیلنے لگے ہیں۔”
جبکہ ایک اور صارف نے مشورہ دیا،
“انہیں بلوچستان نہیں بلکہ خالصتان کی فکر کرنی چاہیے۔”
کچھ صارفین نے دعویٰ کیا کہ سلمان خان کا یہ بیان سوچا سمجھا اور منصوبہ بند معلوم ہوتا ہے اور ممکن ہے کہ انہیں یہ بات جان بوجھ کر کہنے کو کہا گیا ہو۔
