پاکستانی شوبز انڈسٹری کے معروف اداکار، پروڈیوسر اور میزبان فہد مصطفیٰ کے پروڈکشن ہاؤس سے متعلق حال ہی میں نئے انکشافات سامنے آئے ہیں۔ یہ انکشافات ایک فوٹوگرافر عمر سعید نے کیے، جنہوں نے دعویٰ کیا ہے کہ انہیں نوکری سے نکالا گیا اور ادارے کے اندرونی معاملات کچھ اور ہی ہیں۔
سوشل میڈیا پر وائرل ایک ویڈیو میں عمر سعید کا کہنا ہے کہ فہد مصطفیٰ کے پروڈکشن ہاؤس کی تمام سرگرمیوں کی ذمہ داری حنا امان کے پاس ہے، جو نہ صرف اس کے انتظامی امور دیکھتی ہیں بلکہ اب اس پروڈکشن ہاؤس کی اصل مالکن بھی بن چکی ہیں۔
عمر سعید کے مطابق، ادارے میں فیصلے کرنے کا مکمل اختیار صرف حنا امان کے پاس ہے، اور وہ جسے ناپسند کرتی ہیں، اسے فوراً نوکری سے برخاست کر دیا جاتا ہے۔ انہوں نے مزید الزام لگایا کہ کئی معروف ڈائریکٹرز، جنہوں نے کامیاب ڈرامے بنائے، وہ بھی حنا امان کے رویے کی وجہ سے ان کے ساتھ کام نہیں کر پاتے۔
عمر سعید نے کہا کہ پروڈکشن ہاؤس میں “حنا امان کا مکمل راج ہے”، اور جو شخص ان کے خلاف جائے یا ان کی مرضی کے مطابق نہ ہو، وہ جلد ہی منظر سے غائب کر دیا جاتا ہے۔
