بالی ووڈ کے مشہور اور باصلاحیت اداکار شاہد کپور، جو اپنی شاندار اداکاری اور مختلف نوعیت کے کرداروں کے باعث شہرت رکھتے ہیں، اس بار اپنے خاندان سے متعلق ایک دلچسپ انکشاف کی وجہ سے خبروں میں ہیں۔
حال ہی میں ان کے والد اور معروف سینئر اداکار پنکج کپور نے ایک بھارتی پوڈکاسٹ میں گفتگو کرتے ہوئے اپنے خاندان کے پاکستانی پس منظر کے بارے میں بتایا۔
انٹرویو کے دوران پنکج کپور نے انکشاف کیا کہ ان کے آباؤ اجداد کا تعلق پاکستان کے شہر حافظ آباد سے ہے۔ انہوں نے بتایا کہ ان کے دادا سرکاری ملازمت میں تھے جس کی وجہ سے ان کا تبادلہ مختلف شہروں میں ہوتا رہتا تھا، لیکن خاندان کے مطابق ان کی جڑیں حافظ آباد سے ہی وابستہ ہیں، جہاں کپور خاندان ایک مشترکہ خاندانی نظام کے تحت رہتا تھا۔
انہوں نے مزید کہا کہ چونکہ ان کا خاندان تقسیم کے وقت بھارت میں ہی مقیم تھا، اس لیے انہیں کسی بڑی مشکل کا سامنا نہیں کرنا پڑا۔
پنکج کپور نے یہ بھی بتایا کہ ان کے والد نہایت باکمال مصنف، مشہور مقرر اور لاہور کے ایف سی کالج کے معروف میگزین کے ایڈیٹر تھے، جہاں انہیں کالج کا سب سے اسٹائلش شخص سمجھا جاتا تھا۔
