جیکب آباد رپورٹ ایم ڈی عمرانی ۔
جیکب آباد میں سورج آگ برسانے لگا، درجہ حرارت 48 سینٹی گریڈ تک پہنچ گیا، گرمی کے باعث شاہراہیں سنسان، ٹھنڈی مشروبات کی مانگ میں اضافہ، متعدد افراد بے ہوش، ضلعی انتظامیہ نے ہیٹ اسٹروک سے بچاؤ کے لیے کوئی انتظامات نہیں کئے، بجلی کی لوڈشیڈنگ نے عوام کا جینا محال کردیا، لوڈشیڈنگ کے خلاف شہریوں کا احتجاجی مظاہرہ اور دھرنا۔ تفصیلات کے مطابق جیکب آباد اور گردونواح میں جمعہ کے روز درجہ حرارت 48 سینٹی گریڈ رہا اور پورا دن سورج آگ برساتا رہا جس کی وجہ سے شہر کی مارکیٹیں اور شاہراہیں سنسان رہی اور لوگ گرمی سے بچنے کے لیے گھروں میں محصور ہوکر رہ گئے ہیں، عوام نے گرمی سے بچنے کے لیے ٹھنڈی مشروبات کا استعمال کرنا شروع کردیا ہے جس کے باعث ٹھنڈی مشروبات کی مانگ میں اضافہ ہوگیا، شدید گرمی کی وجہ سے شہر بھر میں متعدد افراد کے بے ہوش ہونے کی اطلاعات موصول ہوئی ہیں، گرمی کی شدید لہر کے باوجود ضلع انتظامیہ کی جانب سے ہیٹ اسٹروک سے بچاؤ کے لیے کوئی اقدامات نہیں کئے گئے، عوام نے کہا ہے کہ شہر کے مختلف مقامات پر ٹھنڈے پانی سمیت سائے کے لیے ٹینٹ لگائے جائیں تاکہ عوام کو ہیٹ وویو سے بچایا جاسکے، ایک طرف شدید گرمی دوسری جانب بجلی کی لوڈشیڈنگ نے عوام کا جینا محال کردیا ہے سیپکو حکام کی جانب سے بجلی کی غیر اعلانیہ لوڈشیڈنگ اور ٹرپننگ کی جارہی ہے جس کی وجہ سے شہر کا کاروبار مفلوج ہوکر رہ گیا ہے، بجلی کی بدترین لوڈشیڈنگ کے خلاف سومرو محلہ کیمکینوں نے عبدالسمیع سومرو، عامر علی کھوکھر، صابر علی اوڈھو، میر خان بروہی کی قیادت میں احتجاجی جلوس نکال کر شہر میں مارچ کیا اور بجلی کی لوڈشیڈنگ کے خلاف نعریبازی کی، مظاہرین نے پریس کلب کے سامنے دھرنا دیکر روڈ بلاک کردیا، اس موقع پر شہریوں کا کہنا تھا کہ قیامت خیز گرمی میں بجلی کی بدترین لوڈشیڈنگ کرکے عوام کی زندگی عذاب کردی گئی ہے، انہوں نے کہا کہ شہر کے سٹی 8 فیڈر کو دیہی علاقوں میں شامل کرکے بدترین لوڈشیدڈنگ کی جارہی ہے، شدید گرمی میں عوام کو رلیف فراہم کرنے کے بجائے مزید مشکلات سے دوچارکیا جارہا ہے، انہوں نے مطالبہ کیا کہ سٹی 8 فیڈر کو دیہی علاقے میں شامل کرنے کے بجائے شہری علاقوں میں شامل کیا جائے بصورت دیگر ایسی ذیادتی کے خلاف عدالت جائیں گے، ادھر ڈاکٹروں نے شہریوں کو ہدایات جاری کی ہیں کہ پانی کا زیادہ استعمال کریں غیر ضروری دھوپ میں نہ نکلیں اور ٹھنڈی مشروبات کا استعمال کریں۔
جیکب آباد، بھائیوں کے درمیان پلاٹ کے معاملہ جھگڑا، بھائی نے بھابھی کو قتل اور بھائی کو زخمی کردیا۔ تفصیلات کے مطابق جیکب آباد کی تحصیل گڑہی خیرو کے تاجو دیرو تھانہ کی حدود گاؤں افضل بروہی میں دو بھائیوں کے درمیان پلاٹ کی تقسیم کے معاملے پر جھگڑا ہوگیا، ملزم وحید بروہی نے جھگڑا ختم کرانے کے لیے آنے والی بھابھی حسینہ کو چاقو کے وار کرکے قتل کردیا جبکہ اپنے بھائی علی بخش بروہی کو زخمی کرکے فرار ہوگیا، پولیس نے پہنچ کر لاش اور زخمی کو اسپتال منتقل کیا جہاں لاش ضروری کاروائی کے بعد ورثہ کے حوالے کی گئی جبکہ زخمی کا علاج کیا جارہاہے، پولیس کے مطابق پلاٹ کے معاملے پر بھائیوں کے درمیان جھگڑا ہوا، ملزم وحید بروہی فرار ہوگیا ہے جس کی گرفتاری کے لیے چھاپے مارے جارہے ہیں تاہم آخری اطلاعات تک واقعہ کا مقدمہ درج نہیں ہوسکا تھا۔
جیکب آباد میں آپریشن بنیان مرصوص کی کامیابی کی خوشی میں پاک فوج کے حق میں مسیحی برادری، اسکول کے بچوں، خواجہ سراؤں اور سرکاری ملازمین کی ریلیاں، پاک فوج کے حق میں نعریبازی۔ تفصیلات کے مطابق جیکب آباد میں آپریشن بنیان مرصوص کی کامیابی کی خوشی اور یوم تشکر کے موقع پر پاک فوج کے حق میں مختلف ریلیاں نکال کر پاک فوج سے یکجہتی کا اظہار کیاگیا، مسیحی برادری اوراسکول کے بچوں کی جانب سے ایک ریلی وکٹر پبلک اسکول سے برونر بی نوٹن کی قیادت میں نکالی گئی ریلی میں شامل شرکاء نے شہر کے مختلف راستوں پر مارچ کرتے ہوئے پاک فوج کے حق میں نعریبازی کی، ریلی میں خواجہ سراؤں نے بھی شرکت کرکے پاک فوج سے یکجہتی کا اظہار کیا، علاوہ ازیں سرکاری ملازمین کی جانب سے اسسٹنٹ کمشنر احمر احمد، سول سرجن سول اسپتال ڈاکٹر واجد بھٹو، مختیار کار نیاز جکھرانی، فرحان لاشاری، عبدالنبی سومرو اوردیگر کی قیادت میں ڈی سی آفیس سے ریلی نکالی گئی ریلی کے شرکاء پریس کلب کے سامنے پہنچے جہاں مقررین نے خطاب کرتے ہوئے کہا کہ پاک فوج نے بھارتی جارحیت کا منہ توڑ جواب دیکر پیغام دیا کہ ہم اپنا دفاع کرنا بخوبی جانتے ہیں، دشمن کسی غلط فہمی میں نہ رہے، انہوں نے کہا کہ پاکستان کی فوج نے بھارت کو ایسا جواب دیا کہ وہ پریشان ہوکر سیز فائر کے لیے امریکہ کے ترلے کرنے لگا، انہوں نے کہا کہ بھارت نے اگر دوبارہ غلطی کی تو پاکستان کا بچہ بچہ اپنی فوج کے ساتھ بھارت کو جواب دینے کے لیے تیار ہے
