کراچی – 7 مئی، 2025
سیکریٹری محکمه تعليمات کالجز کا کراچی میں دفاتر اور امتحانی مراکز کا دورہ
سیکریٹری محکمه تعليمات کالجز حکومت سندھ، جناب شہاب قمر انصاری نے آج کراچی میں کالج ایجوکیشن ڈپارٹمنٹ کے دفاتر اور امتحانی مراکز کا دورہ کیا تاکہ انتظامی امور کا جائزہ لیا جا سکے اور امتحانی عمل کو مؤثر اور شفاف بنایا جا سکے۔
جناب شهاب قمر انصاری نے اپنا دورہ ڈائریکٹوریٹ جنرل کالجز سندھ سے شروع کیا، جہاں ڈائریکٹر جنرل کالجز سندھ ڈاکٹر نوید الرب صدیقی اور ریجنل ڈائریکٹر کالجز کراچی پروفیسر فقير محمد لاکهو نے ان کا استقبال کیا اور محکمہ کی جاری علمی اور انتظامی سرگرمیوں پر بریفنگ دی۔
اس کے بعد گورنمنٹ کالج فار ویمن شارعِ لیاقت اور ڈی جے گورنمنٹ سائنس کالج کراچی کے امتحانی مراکز کا دورہ کیا۔ انہوں نے مختلف امتحانی ہالز کا معائنہ کیا اور امتحانی عمل اور فراہم کی گئی سہولیات کا جائزہ لیا۔
اپنے دورے کے دوران، جناب انصاری نے امتحانات کے دوران طلبہ کو سازگار ماحول فراہم کرنے کی اہمیت پر زور دیا۔ انہوں نے متعلقہ اداروں کے پرنسپلز کو ہدایت دی کہ طلبہ کو تمام ضروری سہولیات بروقت اور مکمل طور پر فراہم کی جائیں تاکہ امتحانی عمل میں کسی قسم کی رکاوٹ نہ آئے۔
یہ دورہ محکمہ کالج ایجوکیشن کی جانب سے امتحانی نظام میں شفافیت اور معیار کو برقرار رکھنے کے عزم کی عکاسی کرتا ہے۔
