سندھ ہائر ایجوکیشن کمیشن کی تمام سرکاری جامعات کو ہدایت
20 دسمبر ، 2025FacebookTwitterWhatsapp
کراچی(سید محمد عسکری) سندھ ہائر ایجوکیشن کمیشن (SHEC) نے سندھ کی تمام سرکاری جامعات کو ہدایت کی ہے کہ وہ فیکلٹی ممبران اور پی ایچ ڈی ہولڈرز کو غیر تدریسی انتظامی عہدوں پر اضافی چارج، او پی ایس (OPS) یا لوک آفٹر بنیادوں پر تعینات کرنے کا عمل فوری طور پر ختم کریں، وی سیز تمام اضافی چارج، او پی ایس اور لوک آفٹر انتظامات ختم کر کے رپورٹ ارسال کریں۔ یہ ہدایات سندھ ہائی کورٹ اور سپریم کورٹ آف پاکستان کے حالیہ عدالتی احکامات کی روشنی میں جاری کی گئی ہیں۔ SHEC کی جانب سے جاری کردہ خط کے مطابق سندھ ہائی کورٹ نے آئینی درخواست نمبر 1757/2024 میں 9 دسمبر 2025 کو فیصلہ سناتے ہوئے واضح کیا کہ کوئی بھی فیکلٹی ممبر یا پی ایچ ڈی ہولڈر کسی بھی غیر تدریسی انتظامی عہدے پر، خواہ وہ اضافی چارج، لوک آفٹر یا او پی ایس کے تحت ہو، تعینات یا برقرار نہیں رکھا جا سکتا۔ خط میں مزید کہا گیا ہے کہ سپریم کورٹ نے بھی آئینی درخواست نمبر 7/2024 میں 24اکتوبر 2024کو جاری کردہ حکم میں تمام سرکاری اداروں کو ہدایت کی تھی کہ خالی انتظامی اسامیوں کو قانون کے مطابق مستقل بنیادوں پر پر کیا جائے اور عارضی انتظامات کو فوری طور پر ختم کیا جائے سندھ ہائر ایجوکیشن کمیشن نے وائس چانسلرز کو ہدایت کی ہے کہ وہ تمام اضافی چارج، او پی ایس اور لوک آفٹر انتظامات فوری طور پر ختم کر کے آٹھ ورکنگ دنوں کے اندر عمل درآمد رپورٹ کمیشن کو ارسال کریں۔ خط میں واضح کیا گیا ہے کہ عدالتی احکامات پر عمل نہ کرنے کی صورت میں متعلقہ جامعہ کسی بھی قانونی نتائج کی خود ذمہ دار ہوگی۔
========================
بیجنگ/شیڈونگ: چین کی شیڈونگ یونیورسٹی میں پاکستان اسٹڈی سینٹر کا باضابطہ افتتاح آج پاکستان کے سفیر خلیل ہاشمی نے کیا۔ افتتاحی تقریب میں شیڈونگ یونیورسٹی کے ایگزیکٹو وائس پریذیڈنٹ وو ژین اور فیکلٹی کے اراکین نے شرکت کی۔
پاکستان اسٹڈی سینٹر کے قیام سے پاکستان اور چین کے درمیان تعلیمی تعاون کو فروغ دینے کے ایک نئے باب کا آغاز ہوا ہے۔ یہ مرکز تحقیق، مکالمے اور تعلیمی تبادلوں کے ذریعے باہمی افہام و تفہیم کو مضبوط بنانے میں کردار ادا کرے گا، خاص طور پر زراعت اور ماہی گیری کے شعبوں میں۔
افتتاحی تقریب سے خطاب کرتے ہوئے سفیر خلیل ہاشمی نے شیڈونگ یونیورسٹی کی قیادت کا شکریہ ادا کیا جنہوں نے اس اہم اقدام کی تکمیل میں بھرپور تعاون فراہم کیا۔ انہوں نے کہا کہ پاکستان اور چین کے تعلقات مختلف شعبوں میں تیزی سے فروغ پا رہے ہیں، بالخصوص تعلیم اور تحقیق کے میدان میں نمایاں پیش رفت ہو رہی ہے۔
سفیر پاکستان نے شیڈونگ صوبے کی زراعت اور ماہی گیری کے شعبوں میں عالمی سطح پر شناخت کا حوالہ دیتے ہوئے کہا کہ پاکستان اسٹڈی سینٹر کے قیام کے لیے شیڈونگ ایک موزوں مقام ہے۔ انہوں نے عوامی سطح پر روابط کو مضبوط بنانے میں تعلیمی اداروں اور علمی پلیٹ فارمز کے کردار پر بھی زور دیا۔
پاکستان اسٹڈی سینٹر کا مقصد پاکستان سے متعلق مطالعات، مشترکہ تحقیقی منصوبوں، بزنس ٹو بزنس سرگرمیوں اور طلبہ کے باہمی روابط کو فروغ دینا ہے۔ شیڈونگ یونیورسٹی کا متحرک تعلیمی ماحول اور عالمی وژن اس مرکز کی کامیابی کے لیے مضبوط بنیاد فراہم کرتا ہے۔
افتتاح سے قبل سفیر خلیل ہاشمی نے شیڈونگ یونیورسٹی کے ایگزیکٹو وائس پریذیڈنٹ وو ژین سے ملاقات بھی کی، جس میں نئے قائم ہونے والے مرکز کو تعلیم اور تحقیق، خصوصاً زراعت اور ماہی گیری کے شعبوں میں باہمی مفاد کے لیے استعمال کرنے کے امکانات پر تبادلہ خیال کیا گیا۔ بعد ازاں سفیر پاکستان کو شیڈونگ یونیورسٹی میوزیم کا دورہ بھی کرایا گیا۔
