اسلامی بینکنگ کے نام پر زیادہ سود لیا جا رہا ہے: سلیم مانڈوی والا
سینیٹ کی قائمہ کمیٹی برائے خزانہ نے اسلامی بینکنگ کے نام پر زیادہ سود لینے کے معاملے پر بینکوں کو کمیٹی میں بلانے کا فیصلہ کرلیا۔
سلیم مانڈوی والا کی زیر صدارت سینیٹ کی قائمہ کمیٹی برائے خزانہ کا اجلاس ہوا، جس میں وزیر مملکت خزانہ اور ریلوے بلال اظہر کیانی شریک ہوئے۔
چیئرمین کمیٹی سلیم مانڈوی والا نے کہا کہ اسلامی بینکنگ کے نام پر زیادہ سود لیا جا رہا ہے۔
سینیٹر فاروق ایچ نائیک نے سوال اٹھایا کہ اسٹیٹ بینک کیسے ایسا کر سکتا ہے؟
وزیر مملکت خزانہ بلال اظہر کیانی نے کہا کہ یہ میرے علم میں نہیں تھا، اسٹیٹ بینک سے بات کروں گا، کمیٹی ارکان کے نکتہ نظر سے متفق ہوں۔
ڈپٹی آڈیٹر جنرل نے کہا کہ آڈیٹر جنرل کی رپورٹ میں ٹائپو غلطی ہوئی، اسٹیچوٹری رپورٹ میں کوئی غلطی نہیں، ایگزیکٹو سمری میں غلطی سے ملین کو بلین لکھ دیا گیا، اس سے مجموعی رقم 375 بلین لکھی گئی، انضباطی کارروائی ہو رہی ہے۔
وزیر مملکت خزانہ بلال اظہر کیانی کا کہنا تھا کہ 9 ٹریلین کی مجموعی رقم بنتی ہے، دو اعداد و شمار کو جمع کرتے ہوئے غلطی ہوئی، آڈیٹر جنرل آفس کے ساتھ الگ ملاقات کر کے اعداد و شمار کی جانچ پڑتال کی جاسکتی ہے۔
سینیٹ کی قائمہ کمیٹی نے وزیر مملکت خزانہ بلال اظہر کیانی کی تجویز مان لی۔
سینیٹر کامران مرتضیٰ کا معاملہ ایجنڈے پر برقرار رکھنے کی درخواست بھی کمیٹی نے منظور کر لی۔
سینیٹر ڈاکٹر زرقا نے اجلاس میں ڈریس کوڈ سے متعلق سوالات اٹھاتے ہوئے کہا کہ پاکستان کی خواتین کا لباس پہلے ہی بہت مہذب ہے، جس پر فاروق نائیک نے کہا کہ عبایا پہننے پر مجبور کرنا ایسے ہی ہے جیسے کسی کو داڑھی رکھنے پر مجبور کرنا۔
https://jang.com.pk/news/1529866
============
شاہد آفریدی قومی ہیرو، ان کی توہین پوری قوم کی دل آزاری ہے: رانا عابد حسین
عرفان صدیقی ، ٹوکیو
پاک جاپان بزنس کونسل کے صدر رانا عابد حسین نے کہا ہے کہ سابق کرکٹر شاہد آفریدی پاکستان کے اُن معتبر قومی ہیروز میں شامل ہیں جنہوں نے ہمیشہ وطن کی عزت، وقار اور سالمیت کے لیے آواز بلند کی۔
انہوں نے کہا کہ حالیہ پاک بھارت جنگ کے دوران جس طرح شاہد آفریدی نے پاک فوج اور پاکستانی قوم کے ساتھ کھڑے ہو کر جرأت اور حب الوطنی سے بھرا مؤقف اختیار کیا، اس کی مثال نہیں ملتی۔ اُن کے بھرپور اور اصولی بیانات نے پوری قوم کے دل جیتے اور اُن کی عزت و مقام میں مزید اضافہ ہوا۔
رانا عابد حسین نے افسوس کا اظہار کرتے ہوئے کہا کہ سستی شہرت کے بھوکے چند سوشل میڈیا وارئیرز اور یوٹیوبرز جان بوجھ کر قومی ہیروز کی کردار کشی میں مصروف رہتے ہیں۔
انہوں نے کہا کہ اُن کی یہ حرکت ناصرف غیراخلاقی ہے بلکہ پوری قوم کی دل آزاری اور توہین کے مترادف ہے۔ جو لوگ اپنے ہیروز کو نشانہ بناتے ہیں، وہ اخلاقی پستی کا شکار ہیں اور قوم انہیں کبھی قبول نہیں کرے گی۔
ان کا مزید کہنا تھا کہ شاہد آفریدی کروڑوں پاکستانیوں کا فخر ہیں اور پوری قوم اُن کے ساتھ کھڑی ہے۔
رانا عابد حسین نے مطالبہ کیا کہ سوشل میڈیا پلیٹ فارمز اور اداروں کو اس سلسلے میں مؤثر اقدامات کرنے چاہئیں تاکہ قومی ہیروز کی عزت اور تکریم کو ہر حال میں برقرار رکھا جا سکے
