اسلام آباد ( عاطف شیرازی) سینٹ کی قائمہ کمیٹی برائے پٹرولیم نے تیل وگیس تلاش کرنے والی کمپنیوں کی ڈرلنگ رگز کے پرفارمنس آڈ ٹ کرانے کی سفارش کردی ، اجلا س میں انکشاف کیا گیا کہ بلوچستان میں 80 فیصدگیس میٹرز ٹمپرڈ ہیں، ایس این جی پی ایل اور پٹرولیم ڈویژن کی جانب سے مقامی گیس کی پروڈکشن اور ڈسٹریبوشن بارے مکمل اور درست اعداد وشمار نہ بتانے پر چئیرمین کمیٹی نے ناراضی کا اظہار کیا، گزشتہ روز سینٹ کی قائمہ کمیٹی برائے پٹرولیم کا اجلاس چئیرمین کمیٹی عمرفاروق کی زیرصدارت ہوا، اجلا س میں ایم ڈی ایس این جی پی ایل نےبتایاکہ کے پی میں نئے فیلڈز ملے ہیں وزیرستان اور ڈی آئی خان میں نئے فیلڈ ز دریافت ہوئے ، ایل این جی مہنگی گیس ہے ،آر ایل این جی کی امپورٹ کو کم کیا گیا ہے، ٹیکنکل اسٹڈی کے بعدایل این جی کے کارگو کم کیے ہیں ، سینٹر بلال احمد نےاستفسار کیا کہ بتایا جائے سوئی فیلڈ سے ایس این جی پی ایل کتنی گیس لے رہا ہے ۔
=====================
آئندہ ہفتے ڈبل ڈیکر اور نئی ای وی بسیں چلائی جائینگی، شرجیل میمن
کراچی(اسٹاف رپورٹر) حکومت سندھ نے کراچی میں آئندہ ہفتے سے ڈبل ڈیکر بسیں اور نئی ای وی بسیں سڑکوں پر لانے اور صوبے کے دیگر اضلاع میں پیپلز بس سروس کے نئے روٹس شروع کرنے کا اعلان کردیا۔ سندھ کے سینئر وزیر و صوبائی وزیر ٹرانسپورٹ شرجیل انعام میمن کی زیر صدارت منگل کو یہاں محکمہ ٹرانسپورٹ و ماس ٹرانزٹ کا ایک اہم اجلاس ہوا، جس میں سیکریٹری ٹرانسپورٹ اسد ضامن، سندھ ماس ٹرانزٹ اتھارٹی کی ایم ڈی کنول نظام بھٹو، سی ای او ٹرانس کراچی فواد غفار سومر اور یلو لائن، بی آر ٹی کے پی ڈی ضمیر عباسی نے شرکت کی۔ اجلاس میں یلو لائن اور ریڈ لائن کے ترقیاتی کاموں، ای وی ٹیکسی سروس کے آغاز اور پنک اسکوٹیز اسکیم کے دوسرے مرحلے پر بھی آگاہی دی گئی۔ سینئر وزیر نے امید ظاہر کی کہ ڈبل ڈیکر بسیں اور ای وی بسیں آئندہ ہفتے تک کراچی پہنچ جائیں گی اور ان کے نئے روٹس بھی شروع کئے جا رہے ہیں۔
