ایچ بی ایل مائیکروفنانس بینک نے پاکستان سپیس اینڈ اپر ایٹماسفیئر ریسرچ کمیشن ( SUPARCO) کے اشتراک سے پاکستان کے پہلے کلائمیٹ ا سمارٹ زرعی فنانسنگ کے تحت قرضوں کی فراہمی کا آغاز کردیا ہے ،جس میں سٹیلائیٹ انٹیلی جنس ڈیٹا استعمال کیا جارہا ہے۔یہ اقدام پائیدار اور ٹیکنالوجی پر مبنی زرعی فنانسنگ کی طرف ایک بڑا سنگ میل ہے۔
یہ پائلٹ پراجیکٹ جس کا اعلان پہلے HBL MfB اور سپارکو کے درمیان جدید اشتراک کے طورپرکیا گیا تھا، سیٹلائٹ ڈیٹا انٹیلیجنس، فصلوں کی مانیٹرنگ اور ریموٹ سینسنگ اینالیٹکس کے ذریعے فصلوں کی صحت کا جائزہ لینے، رسک مینجمنٹ میں معاونت فراہم کرنے اور پہلے سے بہتر اور بروقت زرعی قرضوں کے فیصلے ممکن بنانے میں مدد دیتا ہے ۔ پہلے قرض کی فراہمی کے ساتھ یہ شراکت داری، منصوبہ بندی سے موثر عمل درآمد کے مرحلے میں داخل ہوچکی ہے۔
اس پیش رفت پر گفتگو کرتے ہوئے عامر خان، صدر و سی ای او HBL MfB نے کہا ” زراعت پاکستان کی معیشت میں ریڑھ کی ہڈی کی حیثیت رکھتی ہے لیکن موسمیاتی تبدیلی سے سب سے زیادہ متاثر ہوتی ہے۔ سٹیلائیٹ انٹیلی جنس کو ایگری فنانسنگ میں شامل کرکے ہم کسانوں کو ایسے ٹولز سے لیس کررہے ہیں جس سے وہ موسمیاتی تبدیلی کے خطرات کو برداشت کرسکتے ہیں اور پیداوار بہتر بنانے کے ساتھ ساتھ قومی فوڈ سیکورٹی میں کردار ادا کرسکتے ہیں۔اس کے علاوہ اس سے بینکنگ کے شعبے کو زرعی قرضوں کیلئے خطرات کے انتظام میں بھی تقویت ملے گی۔ یہ شراکت داری جدید، جامع اور پائیدار زرعی حل فراہم کرنے کیلئے ہمارے عزم کی عکاس ہے اور ہم اسکو بہت جلد مزید بڑھانے کے خوا ہاں ہیں ۔”
سپارکو کی ریموٹ سنسنگ کی صلاحیتوں اور HBL MfB کی انفرادی قوت کے ذریعے کسان زمین کے استعمال، فصلوں کے پیٹرن اور فصلوں کی کمزوری کے حوالے سے پہلے سے بہتر اورمفید تجزیہ حاصل کرپائیں گے۔شراکت داری ایچ بی ایل مائیکروفنانس بینک کو پائیدار، تیزتر اور پہلے سے بہتر فنانسنگ کی فراہمی کے قابل بناتی ہے جو زمین پر کسانوں کے حقیق حالات سے ہم آہنگ ہے۔
سپارکو کے ممبر ( ایس اے آر) ظفر اقبال نے کہا ” یہ اشتراک پاکستان کی اسپیس ٹیکنالوجی کی معاشی ترقی میں براہ راست معاونت کی صلاحیت کو ظاہرکرتی ہے۔زراعت میں سٹیلائیٹ تجزیہ کا اطلاق کرکے ہم ذریعہ معاش کو نہ صرف مضبوط کررہے ہیں بلکہ قومی موسمیاتی پائیداری میں بھی اپنا حصہ ڈال رہے ہیں۔
ملک کی تقریبا نصف افرادی قوت زرعی شعبے سے وابستہ ہے اور یہ شعبہ قومی معیشت میں نمایاں حصہ ڈالتا ہے ایسے میں ڈیٹا پر مبنی،موسمیاتی لحاظ سے موثر فنانسنگ ماڈلز کی طرف پیش قدمی ناگزیر ہو چکی ہے۔ HBL MfB اور سپارکو کے درمیان یہ اشتراک پورے ملک میں سیٹلائٹ کی مدد سے فراہم کیے جانے والے زرعی قرضوں کے فروغ کے لیے ایک مثال اور رہنما ماڈل ثابت ہوگا۔
