وفاقی وزیر مذہبی امور کی عالمی تبلیغی اجتماع میں شرکت، ملک و عالم اسلام کے لیے خصوصی دعا کی
لاہور: وفاقی وزیر مذہبی امور سردار محمد یوسف نے عالمی تبلیغی اجتماع میں شرکت کی اور اختتامی دعا میں بھی شریک رہے۔ انہوں نے ملک کی سلامتی، عالم اسلام کے استحکام اور مضبوطی کے لیے خصوصی دعا کی۔ وزیر مذہبی امور نے کہا کہ ہر فرد جب اپنے آپ کو درست کرے گا تو پورا معاشرہ بہتر ہو گا۔
سردار محمد یوسف نے عالمی تبلیغی جماعت کے بزرگوں سے خصوصی ملاقاتیں بھی کیں اور اس موقع پر کہا کہ تبلیغی جماعت معاشرے میں دین کے فروغ اور اصلاح نفس کے لیے بھرپور کردار ادا کر رہی ہے۔ انہوں نے مزید کہا کہ اہل اسلام پر مصائب اور جان لیوا آزمائشیں مختلف شکلیں اختیار کر کے آ رہی ہیں اور موجودہ مشکلات سے نجات کا راستہ توحید و سنت پر عمل ہے۔
وفاقی وزیر نے کہا کہ تبلیغی جماعت اسلام کا ابدی اور لاثانی پیغام پوری دنیا میں پھیلا رہی ہے اور تزکیہ نفوس کے لیے کی جانے والی محنت کے مثبت اثرات معاشرے پر مرتب ہو رہے ہیں۔ انہوں نے معاشرے کے ہر فرد پر زور دیا کہ اگر وہ اپنی ذمہ داری محسوس کرے تو معاشرتی ماحول کو بہتر بنایا جا سکتا ہے۔
سردار محمد یوسف نے کہا کہ تبلیغی جماعت دراصل ایمان کی تحریک ہے اور اس کا کام دین کے بنیادی مقصد کی تکمیل ہے۔ انہوں نے تمام افراد سے کہا کہ ہمیں مل کر مثبت اور تعمیری ماحول کو فروغ دینا ہو گا اور ہماری تمام جدوجہد کا مرکز ملک کی سلامتی اور بقاء ہونا چاہیے۔
دورے کے دوران پروفیسر سجاد قمر، قاری محبوب الرحمن اور سردار سید غلام بھی وزیر کے ہمراہ تھے۔
