ایک چینی کمپنی نے اپنے نئے ہیومینائیڈ روبوٹ، آئرن، کا دوسرا ورژن متعارف کرا کر فیزیکل اے آئی کی دنیا میں انقلاب برپا کر دیا ہے۔
روبوٹ ‘ایکس پینگ’ نامی کمپنی نے تیار کیا ہے جو عام روبوٹس کی طرح جھٹکے کھا کر چلنے کے بجائے بالکل انسانی انداز میں چلتا پھرتا ہے۔
کمپنی کے مطابق نئے ماڈل میں انسانی ساخت جیسی ریڑھ کی ہڈی، بائیونک مسلز، مصنوعی نرم جلد اور خود تیار کردہ ٹورنگ اے آئی چپس شامل ہیں، جن کی بدولت روبوٹ اپنی مرضی سے فیصلے کرتا ہے۔
ایکس پینگ کا کہنا ہے کہ اگلے سال آئرن روبوٹ کی بڑے پیمانے پر پیداوار کا عمل شروع کیا جائے گا اور اسے سروس انڈسٹریز جیسے ریسیپشن، شوروم اسسٹنس اور عام سہولتی کاموں پر لگایا جائے گا۔
کمپنی نے واضح کیا کہ اس کے نئے منصوبے برقی گاڑیوں سے آگے بڑھ کر مصنوعی ذہانت، خودکار ڈرائیونگ اور ایوی ایشن کے شعبوں میں انقلاب کی حکمت عملی کا حصہ ہیں۔
اس کے علاوہ کمپنی نے 3 اور بڑی ٹیکنالوجیز متعارف کرائیں جن میں ایکس پینگ وی ایل اے 2.0، روبوٹیکسی، اور 2 فلائنگ سسٹمز شامل ہیں۔
کمپنی کے مطابق یہ تمام منصوبے بڑے پیمانے پر پیداوار کے منصوبے کے ساتھ پیش کیے گئے ہیں، جس سے ظاہر ہوتا ہے کہ فزیکل اے آئی مستقبل کا تصور نہیں بلکہ حقیقت بن چکا ہے۔
ایکس پینگ کے چیئرمین اور سی ای او ہی شیاؤ پینگ نے اعلان کیا کہ کمپنی کی نئی شناخت ’’فزیکل اے آئی کی دنیا میں موبیلٹی ایکسپلورر اور عالمی ایمباڈڈ انٹیلیجنس کمپنی‘‘ کے طور پر کی جائے گی۔
