وفاقی حکومت نے صحافیوں اور میڈیا پروفیشنلز کے تحفظ کے ایکٹ 2021 کی شق 11 کے تحت صحافیوں اور میڈیا ورکرز کے تحفظ کیلیے ایک خود مختار کمیشن قائم کردیا ہے۔ اس حوالے سے وزارت اطلاعات و نشریات نے باقاعدہ نوٹیفکیشن بھی جاری کردیا۔
سرکاری اعلامیے کے مطابق نیا قائم شدہ کمیشن قانون کے تحت مقرر کردہ تمام اختیارات استعمال کرے گا اور اپنے تفویض کردہ فرائض بااختیار انداز میں انجام دے گا۔ کمیشن کا مقصد صحافیوں کی سکیورٹی، ان کے حقوق کا تحفظ اور پیشہ ورانہ امور میں سہولت فراہم کرنا ہے۔
نوٹیفکیشن کے مطابق کمیشن میں پی آئی او/ ای ڈی جی (ایکس آفیشیو)، وزارت اطلاعات، ڈائریکٹر جنرل ہیومن رائٹس (ایکس آفیشیو)، وزارت انسانی حقوق کے اراکین شامل ہوں گے، جبکہ بطور ممبرز میڈیا نمائندگان میں پریس ایسوسی ایشن آف سپریم کورٹ، غلام نبی یوسفزئی، نیشنل پریس کلب اسلام آباد، نیئر علی، پارلیمانی رپورٹرز ایسوسی ایشن آف پاکستان، نوید اکبر چوہدری شامل ہیں۔
کمیشن میں بطور ممبر پاکستان فیڈرل یونین آف جرنلسٹس کے نمائندے (برنا) کے افضل بٹ، (برنا عظیم گروپ) کے حسن عباس، (دستور) کے محمد نواز رضا جبکہ دیگر یونینز کے نمائندے کراچی یونین آف جرنلسٹس کے طاہر حسن خان، پنجاب یونین آف جرنلسٹس کی تمثیلہ چشتی، خیبر یونین آف جرنلسٹس کی نادیہ صبوحی، بلوچستان یونین آف جرنلسٹس کے خلیل احمد شامل ہیں۔
ذرائع کے مطابق کمیشن جلد اپنے باضابطہ اجلاس کا آغاز کرے گا، جس میں صحافیوں کی سیکیورٹی، شکایات کے ازالے، اور سوشل و الیکٹرانک میڈیا پروفیشنلز کو درپیش خطرات سے متعلق اہم فیصلے کیے جائیں گے۔
============================
مقبوضہ کشمیر: سری نگر میں پولیس اسٹیشن میں دھماکا، 8 افراد زخمی
مقبوضہ کشمیر میں سری نگر کے نوگام پولیس اسٹیشن میں دھماکے کے نتیجے میں 8 افراد زخمی ہوگئے۔
بھارتی میڈیا کا کہنا ہے کہ دھماکا ضبط شدہ امونیم نائٹریٹ پھٹنے سے ہوا ہے، دھماکا اُس وقت ہوا جب پولیس اہلکار اور فارنزک سائنس لیبارٹری (ایف سی ایل) کی ٹیم اسٹیشن کے اندر معائنے میں مصروف تھی۔
دھماکے کے بعد پولیس اسٹیشن کے احاطے میں کھڑی متعدد گاڑیاں بری طرح متاثر ہوئیں، فائر ٹینڈرز موقع پر پہنچیں اور علاقے کی سڑکیں بند کردی گئیں۔
دھماکے کی نوعیت اور وجہ جاننے کے لیے تحقیقات جاری ہیں۔
