14نومبر، 2025ء
10ویں پاکستان بینکاری ایوارڈز سے گورنر اسٹیٹ بینک کا خطاب
10ویں پاکستان بینکاری ایوارڈز کی تقریب کراچی کے پرل کانٹینینٹل ہوٹل میں منعقد کی گئی، جس میں بینکاری شعبے میں شاندار کارکردگی کا مظاہرہ کرنے والے بینکوں کو سراہا گیا۔ اس تقریب میں بینک دولتِ پاکستان کے گورنر جناب جمیل احمد نے بطور مہمانِ خصوصی شرکت کی اور میزان بینک کو بہترین بینک کے ایوارڈ سے نوازتے ہوئے اس کی شاندار کارکردگی اور عمدہ خدمات جاری رکھنے کے عزم کو سراہا۔
اپنے خطاب میں، گورنر اسٹیٹ بینک نے ملک میں بینکاری کے معیار کو بلند کرنے میں ان ایوارڈز کے اہم کردار کا مشاہدہ کیا۔ اس تناظر میں، انہوں نے جدت، شمولیت اور ذمہ داری کے ذریعے بینکاری نظام کی ناگزیرتبدیلی کی غرض سے اگلی دہائی کے لیے ایک خاکہ پیش کیا۔ انہوں نے کہا کہ یہ تبدیلی اس وقت تک ممکن نہیں ہوگی جب تک بینک اپنے کاروباری ماڈلز کو نجی شعبے، خاص طور پر ایس ایم ایز اور چھوٹے ڈپازٹرز کی مالی ضروریات کو پورا کرنے کے لیے دوبارہ ترتیب نہ دیں۔ گورنر اسٹیٹ بینک نے کہا کہ ” حکومت کو قرض دے کر بآسانی حاصل ہونے والے نفع پر انحصار کرنے والے بینک ،اُن بینکوں سے پیچھے رہ جائیں گے جو ڈپازٹس مجتمع کر رہے ہیں اور محروم طبقات کی بڑھتی ہوئی قرض کی ضروریات کو پورا کر رہے ہیں،” ۔
آگے چل کر ، گورنر اسٹیٹ بینک نے چار اہم شعبوں پر بینکوں کو توجہ مرکوز کرنے کی ترغیب دلائی۔ سب سے پہلے، بینکوں کو اپنے صارفین کے روزمرہ کے ڈجیٹل تجربات اور اپنے کاروباری آپریشنز بشمول موبائل کامرس، زرعی سپلائی چینز، کریڈٹ اسکورنگ، اور انتظامِ خطر میں ڈجیٹا ئزیشن کو شامل کرنا چاہیے۔ دوسرا، بینکوں کو مصنوعی ذہانت (اے آئی)اور مشین لرننگ ٹولز سے استفادہ کرنا چاہیے تاکہ مصنوعی ذہانت کی طرف سے فراہم کردہ متبادل معلومات کو استعمال کرتے ہوئے زیادہ محتاط رسک ماڈلز بنائے جاسکیں، اور چھوٹی فرموں، اسٹارٹ اپس، اور انٹری پرینورز ، جنہیں روایتی دستاویزات کی کمی کا سامنا ہو ،کے لیے تخصیصی مالی مصنوعات تشکیل دی جائیں ۔ تیسرا، قرضوں کے حوالے سے بینکوں کے فیصلوں میں ماحولیاتی خطرات کو ملحوظ رکھا جائے،پائیداری کے واضح اہداف مقرر کیے جائیں، اور موسمیاتی فنانسنگ کے لیے گرین بانڈز اور پائیداری سے مشروط قرضہ جاتی مصنوعات تشکیل دی جائیں ۔ آخر میں، بینکوں کو اپنی ترجیحات کا از سر نو جائزہ لینا چاہیے اور پاکستان کے برآمد کنندگان کو بہتر سہولتوں کی فراہمی کے ساتھ انہیں مضبوط کرنے کے لیے اپنے کاروباری ماڈل کو حکمت عملی کے ساتھ تبدیل کرنا چاہیے۔
نیشنل انسٹی ٹیوٹ آف بینکنگ اینڈ فنانس (نباف)پاکستان نے ڈان میڈیا اور اے ایف فرگوسن اینڈ کمپنی کے تعاون سے 10ویں پاکستان بینکنگ ایوارڈز کی تقریب کا اہتمام کیا۔ گورنر اسٹیٹ بینک نے مالی شعبے میں مسلسل 10 سال سے بہترین کارکردگی، جدت طرازی اور دیانتداری کو فروغ دینے پر تینوں شراکت داروں اور پاکستان بینکنگ ایوارڈز کو سراہا۔
دیگر ایوارڈز کی تفصیلات درج ذیل ہیں:
خواتین کی مالی شمولیت میں بہترین کارکردگی دکھانے پر بہترین بینک کا ایوارڈ بینک آف پنجاب کو؛ بہترین مائیکروفنانس ادارے کا ایوارڈ کشف فاؤنڈیشن کو ؛ بہترین ایس ایم ایز بینک کا ایوارڈ بینک آف پنجاب کو جبکہ زراعت میں شمولیت کے حوالے سے بہترین بینک کا ایوارڈ بینک آف پنجاب کو؛ ڈجیٹل میدان میں بہترین کارکردگی دکھانے پر بینک الفلاح کو؛ صارفین سے بہترین روابط کا ایوارڈ بینک الفلاح کو؛ متوسط حجم کے بہترین بینک کا ایوارڈ فیصل بینک کو اور ای ایس جی کے اعتبار کے بہترین بینک کا ایوارڈ ایچ بی ایل کو دیا گیا۔
