لاڑکانہ رپورٹ محمد عاشق پٹھان
مزدوروں کا اعلان جنگ، وفاقی حکومت کی نجکاری پالیسی کے خلاف ہائیڈرو یونین کا تاریخی اعلان، دما دم مست قلندر کی گونج پورے ملک میں سنائی دے گی یونین کے مرکزی صدر عبداللطیف نظامانی نے سخت مذاحمت کا اعلان کردیا تفصیلات کے مطابق
آل پاکستان واپڈا ہائیڈرو الیکٹرک ورکرز لیبر یونین (CBA) کے مرکزی صدر اور ٹریڈ یونین فیڈریشن پاکستان کے چیئرمین عبداللطیف نظامانی نے وفاقی حکومت پر سخت تنقید کرتے ہوئے کہا ہے کہ موجودہ حکمران آئی ایم ایف اور ورلڈ بینک کے اشاروں پر ملکی اثاثے بیچ کر پاکستان کی خودمختاری گروی رکھ رہے ہیں، انہوں نے خبردار کیا کہ بجلی کی 4 تقسیم کار کمپنیوں کی نجکاری مزدور دشمن اور عوام دشمن اقدام ہے جس کی ہر سطح پر نہ صرف بھرپور مزاحمت کی جائے گی بلکہ پورے ملک کے مزدور دوبارہ اسلام آباد میں دھرنا دیں گے ، عبداللطیف نظامانی نے لاڑکانہ میں مزدور کنونشن سے خطاب اور میڈیا سے گفتگو کرتے ہوئے کہا کہ حکومت کرپشن اور اقرباپروری کے ذریعے ملک میں انارکی اور معاشی غلامی پھیلانا چاہتی ہے، مگر مزدور طبقہ اب خاموش نہیں رہے گا۔ ان کا کہنا تھا ہم کسی قیمت پر بجلی کمپنیوں کی نجکاری ہونے نہیں دیں گے اگر حکومت زبردستی کرے گی تو دما دم مست قلندر ضرور ہوگا، اب اسلام آباد صرف ایک دھرنے کا نہیں بلکہ ملک گیر مزدور تحریک کا گواہ بنے گا، انہوں نے انکشاف کیا کہ پچھلے ساڑھے آٹھ سالوں سے ڈسکوز میں بھرتیاں بند ہیں، 60 ہزار سے زائد آسامیاں خالی ہیں اس کے باوجود حکومت ادارے سرمایہ داروں کے حوالے کر رہی ہے، ان کے مطابق، نجکاری سے نہ صرف ہزاروں خاندان بے روزگار ہوں گے بلکہ قومی ادارے تباہ اور بجلی مزید مہنگی ہو جائے گی، عبداللطیف نظامانی نے کہا کہ آئی ایم ایف کے کہنے پر پینشنز بند کرنا ظلم کی انتہا ہے، دنیا بھر میں نجکاری ناکام ثابت ہوئی یہ پالیسی عوام کو ریلیف نہیں بلکہ تباہی دے گی، ہمارا ادارہ پبلک سروس کا ادارہ ہے، ہم ملک کے محافظ ہیں، سیٹھوں کے غلام نہیں، انہوں نے کہا کہ بجلی ملازمین اپنی جانیں خطرے میں ڈال کر عوام کو روشنی دیتے ہیں مگر پاور کمپنیاں سیفٹی کٹس اور حفاظتی آلات دینے میں سنجیدہ نہیں، جس کے باعث حادثات بڑھ رہے ہیں، ایک ایک ملازم کو تین تین لوگوں کا کام کرنا پڑتا ہے، افسران کا رویہ ظالمانہ ہے اور مزدور ذہنی دباؤ کا شکار ہیں، نظامانی نے مزید کہا کہ سیپکو میں موجود لاڑکانہ میڈیکل سینٹر کو ڈسپنسری کا درجہ دیا جائے، برطرف ملازمین کو بحال، زیر التوا پروموشن مکمل اور ڈیوٹی کے دوران شہید ہونے والے ملازمین کے بچوں کو فوراً سرکاری نوکریاں دی جائیں، قبل ازیں ہائیڈرو یونین کے وفد نے سی ای او سیپکو اعجاز احمد چنہ سے ملاقات کر کے ورکس کاؤنسل کی میٹنگ منعقد کرتے ہوئے مزدوروں کے مسائل پیش کیے، جس پر سی ای او نے موقع پر متعلقہ افسران کو احکامات جاری کیے، عبد اللطیف نظامانی نے واضح کیا کہ ہم بجلی پیدا کرتے ہیں، ہم اندھیروں کو روشنی میں بدلتے ہیں لیکن اگر حکومت نے عوام کی روشنی چھینی تو ہم بھی خاموش نہیں رہیں گے کیونکہ یہ لڑائی مزدور، عوام اور پاکستان کے مستقبل کی ہے ، علاوہ ازیں، ہائیڈرو یونین کے مرکزی صدر عبد اللطیف نظامانی نے تزئین و آرائش کے بعد لیبر ہال لاڑکانہ کا دورہ کیا اور قومی پرچم لہرا کر نئے جلسہ گاہ کا باقاعدہ افتتاح کیا، اس موقع پر یونین کے ریجنل چیئرمین نثار شیخ اور آفس سیکریٹری ریاض سانگی کو ان کی شاندار خدمات کے اعتراف میں یادگاری شیلڈز پیش کی گئیں، تقریب میں عبداللہ سومرو، محمود پٹھان، علی محمد جتوئی، ہادی بخش، خرم میمن، وسیم جتوئی، ناہید جتوئی سمیت دیگر رہنما بھی موجود تھے
