ڈاکوؤں نے ایک اور زندگی کا چراغ گل کر دیا، رواں برس تعداد 79 ہوگئی
14 نومبر ، 2025
کراچی (اسٹاف رپورٹر)شہر میں ڈاکوؤں نے ایک اور زندگی کا چراغ گل کر دیا ، رواں برس ڈاکوؤں کی فائرنگ سے جاں بحق ہونے والے شہریوں کی تعداد 79 ہوگئی ، تفصیلات کے مطابق شرافی گوٹھ تھانے کی حدود میں واقع شاہ علی گوٹھ کے قریب محمد سٹی میں گھر میں ڈکیتی کی واردات کے دوران مزاحمت پر مسلح ملزمان نے فائرنگ کرکے ایک شہری کو زخمی کر دیا جسے جناح اسپتال منتقل کیا جا رہا تھا کہ وہ راستے میں ہی چل بسا،مقتول کی شناخت 50 سالہ شاہد ولد کریم خان کے نام سے ہوئی ہے،پولیس کے مطابق تین مسلح ڈکیت گھرمیں ڈکیتی کے لیے داخل ہوئے تو مقتول نے مزاحمت کی جس پر مسلح ملزمان نے فائرنگ کردی اور فرار ہو گئے،جناح اسپتال میں مقتول کےرشتہ دار محمد عمیر نے بتایا کہ مقتول گھر کا واحد کفیل ، تین بچوں کاباپ اور نجی میڈیسن کمپنی میں ملازم تھا۔
========================
برطانیہ کے شاہ چارلس سوم کی 77ویں سالگرہ کی تقریب: وزیراعظم شہباز شریف اور برطانوی ہائی کمشنر نے کیک کاٹا،دونوں ممالک کا تعلقات کو مضبوط بنانے کے عزم کا اعادہ
اسلام آباد:وزیراعظم محمد شہباز شریف نے پاکستان اور برطانیہ کے تعلقات کو مضبوط بنانے کے عزم کا اعادہ کرتے ہوئے اس یقین کا اظہار کیا ہے کہ مختلف شعبوں میں شراکت داری سے دوطرفہ تعاون کو نئی جہت ملے گی۔ دونوں ملکوں کے قریبی تعلقات میں برطانوی شاہی خاندان کے اہم کردار کے معترف ہیں۔
برطانیہ کے شاہ چارلس سوم کی 77ویں سالگرہ کی تقریب برطانوی ہائی کمیشن اسلام آباد میں ہوئی۔ وزیراعظم محمد شہباز شریف اور برطانوی ہائی کمشنر جین میریٹ نے کیک کاٹا۔ وفاقی کابینہ کے ارکان ، پارلیمنٹرینز، سفارتکاروں اور مختلف شعبہ زندگی سے تعلق رکھنے والے افراد تقریب میں شریک ہوئے۔
اس موقع پر خطاب میں وزیراعظم محمد شہباز شریف نے شاہ چارلس سوم کی عوامی فلاح کے لئے خدمات کو خراج تحسین پیش کرتے ہوئے ان کے لئے نیک خواہشات کا اظہار کیا۔ وزیراعظم نے کہا کہ یہ تقریب پاکستان اور برطانیہ کے قریبی تعلقات کی عکاس ہے۔شاہ چارلس سوم اور ملکہ برطانیہ کو دورہ پاکستان کی دعوت کا اعادہ کرتے ہوئے محمد شہباز شریف نے کہا کہ دونوں ملکوں کے درمیان شراکت داری کو مزید وسعت دینے کے لئے پرعزم ہیں۔
وزیراعظم نے پاکستان میں دہشت گردی کے حالیہ واقعات پر برطانیہ کی طرف سے اظہار یکجہتی پر شکریہ ادا کرتے ہوئے کہا کہ ہم اس ناسور کو ختم کرکے دم لیں گے۔
محمد شہباز شریف نے برطانیہ کے لئے پروازوں کی بحالی پر ہائی کمشنر جین میریٹ کی کاوشوں کو سراہا۔انہوں نے تعلیم، صحت، فنی تربیت اور دیگر شعبوں میں تعاون مزید بڑھانے کی خواہش کا اظہار کیا۔
برطانوی ہائی کمشنر جین میریٹ نے اپنے خطاب میں پاکستان کے ساتھ مختلف شعبوں میں تعاون میں اضافے کے لئے اقدامات جاری رکھنے کے عزم کا اعادہ کیا۔ انہوں نے برطانیہ میں مقیم پاکستانی کمیونٹی کے اہم کردار کو سراہتے ہوئے کہا کہ دوطرفہ تعلقات کو مزید وسعت دینے کے لئے کاوشیں جاری رکھیں گے۔
