پشاور، 12 نومبر 2025
گورنر خیبرپختونخوا فیصل کریم کنڈی سے پاکستان میں تعینات امریکہ کی سفیر نیٹلی اے بیکر نے گورنر ہاؤس پشاور میں ملاقات کی۔ملاقات میں پشاور میں تعینات امریکہ کے قونصل جنرل تھامس ایکرٹ بھی موجود تھے۔ملاقات میں دو طرفہ تعلقات، باہمی دلچسپی کے امور، خیبرپختونخوا میں سرمایہ کاری کے امکانات اور مختلف شعبوں میں تعاون کے فروغ پر تفصیلی گفتگو ہوئی۔ ملاقات میں صوبے میں سیاحت، بالخصوص مذہبی سیاحت کے فروغ، اقتصادی تعاون اور ترقیاتی شراکت داری کے امکانات پر بھی تبادلہ خیال کیاگیا۔گفتگو کے دوران صوبے میں امن و امان کی صورتحال، پاک افغان سرحدی صورتحال پر بھی گفتگو بھی کی گئی- گورنر خیبرپختونخوا نے امریکی سفیر کو صوبے میں سرمایہ کاری کے لیے دستیاب مواقع سے آگاہ کرتے ہوئے بتایا کہ خیبرپختونخوا صوبہ جغرافیائی صورتحال و قدرتی وسائل سے مالا مال ہونے کے باعث انتہائی اہمیت کا حامل ہے، امریکہ ہمارا ترقیاتی شراکتدار دوست ملک ہے، ہماری خواہش ہے کہ صوبہ میں مختلف شعبوں میں جاری دو طرفہ تعاون کو مزید وسعت دی جائے، خیبرپختونخوا میں سب سے بہترین اور قیمتی سرمایہ کاری ہمارے نوجوانوں کو امریکن تعلیمی اداروں میں اسکالرشپس کی فراہمی ہے، صوبہ کے نوجوان کھیل اور تعلیم کے شعبہ میں کمال صلاحیت رکھتے ہیں، انہوں نے کہا کہ گورنر ہاؤس کیجانب سے صوبہ میں انڈسٹریل شعبہ کی ترقی اور
نوجوانوں کو اسپورٹس اور تعلیمی شعبہ میں آگے لانے اور خواتین کو خودمختار بنانے کیلئے اقدامات اٹھائے جا رہے ہیں، انہوں نے تعلیم، صحت، قابلِ تجدید توانائی اور سیاحت کے شعبوں میں پاک امریکہ شراکت داری کے فروغ پر زور دیتے ہوئے کہا کہ اس سے پاک امریکہ تعلقات مزید مضبوط ہوں گے اور مشترکہ تعاون سے صوبے میں پائیدار ترقی کے اہداف بھی حاصل کیے جا سکیں گے۔اس موقع پر گورنر خیبرپختونخوا نے امریکن سفیر کو خیبرپختونخوا کی روایتی شال بھی پہنائی۔ ملاقات میں امریکن سفیر نے پروقار میزبانی پر گورنر خیبرپختونخوا کا شکریہ ادا کرتے ہوئے کہا کہ پاکستان اور امریکہ کے عوام کے درمیان دیرینہ دوستانہ تعلقات ہیں، امریکہ ملک بھر بالخصوص خیبرپختونخوا کے عوام کی ترقی و خوشحالی کیلئے تمام شعبوں میں دو طرفہ تعاون کیلئے پرعزم ہے، امریکن سفیر نے دہشتگردی کیخلاف جنگ میں خیبرپختونخوا کے عوام، پولیس اور سیکورٹی فورسز کی شہادتوں پر بھی ہمدردی کا اظہار کیا، امریکن سفیر نے صوبہ کی ترقی و خوشحالی کیلئے صوبائی حکومت کیساتھ ملکر آگے بڑھنے کے گورنر خیبرپختونخوا کے عزم کی بھی تعریف کی۔
#standwithkp #KhyberPakhtunkhwa #GovernorKP #Pakistan
