گلوبل گرین گروتھ انسٹی ٹیوٹ (جی جی جی آئی) نے ماحولیاتی بہتری کے عالمی مشن میں پنجاب حکومت کے ساتھ شراکت داری پر اتفاق کیا ہے۔ اس سلسلے میں وزیر اعلیٰ پنجاب مریم نواز شریف سے جی جی جی آئی کے ڈائریکٹر جنرل کِم سینگ ہے اَپ (KIM SANG-HYUP) کی ملاقات ہوئی، جس میں ماحولیاتی تبدیلیوں کے خطرات اور ان کے سدباب کے اقدامات پر تفصیلی تبادلہ خیال کیا گیا۔
ملاقات میں جی جی جی آئی کے ڈائریکٹر جنرل نے پنجاب حکومت کے ماحولیاتی بہتری کے اقدامات کو سراہا اور وزیر اعلیٰ مریم نواز شریف کے وژن اور عزم کی تعریف کی۔ انہوں نے کہا کہ جی جی جی آئی پنجاب کو کاربن فنانسنگ اور عالمی کاربن مارکیٹ میں شمولیت میں مدد فراہم کرے گا اور گرین گروتھ پروجیکٹس بنانے میں معاونت کرے گا۔
وزیر اعلیٰ پنجاب نے جی جی جی آئی کی خدمات کو سراہا اور گزشتہ ڈیڑھ سال میں پنجاب میں کیے گئے ماحولیاتی بہتری کے اقدامات سے آگاہ کیا۔ انہوں نے کہا کہ جی جی جی آئی کے تجربات اور معاونت سے ماحولیاتی بہتری کے وژن کو آگے بڑھانا ممکن ہوگا۔
جی جی جی آئی، جو 2012 میں اقوام متحدہ کی پائیدار ترقی کی کانفرنس (ریوپلس20) میں تشکیل دیا گیا، بین الاقوامی کاربن مارکیٹس میں شمولیت کے لیے ممالک کو معاونت فراہم کرتا ہے اور ترقی پذیر ممالک میں گرین مالی امداد کے مواقع فراہم کرتا ہے۔ پنجاب جی جی جی آئی کے تعاون سے موجودہ موسمیاتی اقدامات کے ساتھ ساتھ ممکنہ گرین فنانسنگ پروجیکٹس جیسے واٹر اینڈ سینی ٹیشن پروگرامز، سُتھرا پنجاب، ای موبلٹی، اینٹی سموگ مٹیگیشن اور پلانٹ فار پاکستان میں حصہ لے سکے گا۔
ملاقات میں سینیئر صوبائی وزیر مریم اورنگزیب، صوبائی وزرا رانا سکندر اور ذیشان رفیق، چیف سیکرٹری زاہد اختر زمان، چیئرمین پی اینڈ ڈی نعیم رؤف اور ڈی جی ای پی اے عمران حامد بھی موجود تھے۔
