محکمہ انسانی حقوق سندھ اور انڈس کاٹیج لائبریری نیٹ ورک کے مابین صوبے میں انسانی حقوق کی تعلیم کے فروغ کے لیے یاداشت پر دستخط
کراچی، 13 نومبر 2025ء —
محکمہ انسانی حقوق حکومتِ سندھ نے اپنے ڈائریکٹوریٹ آف ہیومن رائٹس کے ذریعے انڈس کاٹیج لائبریری نیٹ ورک (ICLN) پاکستان کے ساتھ ایک مفاہمتی یادداشت (MoU) پر دستخط کیے ہیں تاکہ سندھ بھر کے طلبہ میں لائبریری پر مبنی تعلیم اور تخلیقی مقابلوں کے ذریعے انسانی حقوق کی تعلیم اور آگاہی کو فروغ دیا جا سکے۔اس موقع پر راجویر سنگھ سوڈھا معاونِ خصوصی برائے انسانی حقوق وزیرِ اعلیٰ سندھ نے کہا کہ
ہمارا وژن یہ ہے کہ نوجوان نسل کو مساوات، رواداری، امن اور انصاف کی اقدار سے بااختیار بنایا جائے۔ لائبریریوں اور تعلیمی مقامات کے ذریعے انسانی حقوق کی تعلیم کو فروغ دے کر ہم ایک ایسے مستقبل کی تشکیل چاہتے ہیں جو احترام، فہم و فراست اور سماجی ہم آہنگی پر مبنی ہو۔ یہ منصوبہ راجویر سنگھ سوڈھا کی رہنمائی اور وژن کے تحت نافذ کیا جا رہا ہے جو انسانی حقوق کی سرکاری حکمتِ عملی میں نوجوانوں کی شمولیت کو ایک کلیدی جزو قرار دیتے ہیں۔ یہ شراکت داری تعلیمی ماحول میں انسانی حقوق کی تعلیم کو شامل کرنے کا مقصد رکھتی ہے تاکہ ایک ایسی نسل تیار کی جا سکے جو باشعور، ذمہ دار اور ہمدرد شہریوں پر مشتمل ہو۔تقریب سے خطاب کرتے ہوئے آغا فخر حسین ڈائریکٹر ہیومن رائٹس نے کہا کہ یہ اشتراک حکومتِ سندھ کے اُس پختہ عزم کی عکاسی کرتا ہے جس کے تحت تعلیم کو مضبوط بنانا اور تخلیقی و شراکتی تعلیمی طریقوں کے ذریعے انسانی حقوق کے احترام کو فروغ دینا شامل ہے۔ واضح رہے کہ
انڈس کاٹیج لائبریری نیٹ ورک (ICLN) پاکستان 2015ء سے ملک بھر کے تعلیمی اداروں میں مطالعے، تحریر اور مکالمے کی ثقافت کو فروغ دینے کے لیے کوشاں ہے۔ اب تک ملک بھر میں 870 سے زائد لائبریریاں قائم کی جا چکی ہیں، جن میں 80,000 سے زیادہ طلبہ اور اساتذہ مطالعہ کر رہے ہیں جب کہ روزانہ 2,000 سے زائد طلبہ کتابوں کے تجزیے (Book Reviews) لکھتے ہیں۔
مفاہمتی یادداشت کے تحت سندھ بھر میں آئی سی ایل این کے 200 سے زائد اسکول لائبریری نیٹ ورک میں تقاریر، مضمون نویسی کے مقابلے، کوئز اور آگاہی سرگرمیوں کی ایک سلسلہ وار مہم منعقد کی جائے گی۔ دونوں ادارے طلبہ میں مطالعے، غور و فکر اور انسانی حقوق کی آگاہی کو فروغ دینے کے لیے باہمی اشتراک سے کام کریں گے۔آغا نور محمد، چیف ایگزیکٹو آفیسر، آئی سی ایل این پاکستان نے حکومتِ سندھ کی قیادت کو سراہتے ہوئے کہا کہ یہ شراکت داری ایک اہم سنگِ میل ہے، جو ایک برداشت پر مبنی، تعلیم یافتہ اور انسانی حقوق سے آگاہ معاشرہ تشکیل دینے کے صوبائی وژن کو عملی جامہ پہنانے کی سمت ایک مثبت قدم ہے۔
