محکمہ انسانی حقوق سندھ کا ضلع تھر پارکر میں ہونے والے خودکشی کے واقعات کی تحقیقات کرنے کا فیصلہ
کراچی، 12 نومبر 2025 —
وزیر اعلیٰ سندھ کے معاون خصوصی برائے انسانی حقوق راجویر سنگھ سوڈھا کی خصوصی ہدایت پر حکومتِ سندھ محکمہ انسانی حقوق کے ڈائریکٹوریٹ نے تھرپارکر کے علاقے دانو ڈھنڈھل، نگرپارکر میں تین نوجوانوں کی المناک ہلاکت کے واقعے کی حقائق جانچ (Fact-Finding) تحقیقات کا آغاز کر دیا ہے۔
اس سلسلے میں ڈائریکٹر ڈائریکٹوریٹ آف ہیومن رائٹس آغا فخر حسین کی زیر صدارت ایک اہم اجلاس منعقد ہوا جس میں غلام عباس کھوسو، فوکل پرسن برائے سویسائیڈ پریوینشن انیشی ایٹو (SPI) اور دیگر متعلقہ اسٹیک ہولڈرز نے شرکت کی۔ اجلاس میں واقعے کا جائزہ لیا گیا اور فوری اقدامات پر تبادلہ خیال ہوا۔
متفقہ طور پر فیصلہ کیا گیا کہ ایک تحقیقاتی ٹیم علاقے کا دورہ کرے گی جس میں ایک ماہر نفسیات، ایک سماجی ماہر، اور مقامی انتظامیہ و قانون نافذ کرنے والے اداروں کے نمائندے شامل ہوں گے جو صورتحال کا تفصیلی جائزہ لے کر جامع رپورٹ مرتب کریں گے۔مزید یہ کہ ڈائریکٹوریٹ نے سویسائیڈ پریوینشن انیشی ایٹو (SPI) کے تحت ایک خصوصی کوآرڈینیشن اور ریسپانس سینٹر قائم کرنے کا بھی فیصلہ کیا تاکہ آگاہی، رابطہ کاری اور بروقت مدد کے نظام کو مزید مضبوط بنایا جا سکے۔آغا فخر حسین نے اس موقع پر کہا کہ انسانی جان بے حد قیمتی ہے اور حکومتِ سندھ ذہنی دباؤ اور سماجی مسائل کے حل کے لیے مربوط اور ہمدردانہ اقدامات کرنے کے لیے پُرعزم ہے۔
