پاکستان اور سری لنکا کے درمیان تین ون ڈے میچوں کی سیریز کا پہلا میچ راولپنڈی میں کھیلا جائےگا۔
پنڈی اسٹیڈیم میں مقابلہ دن ڈھائی بجے شروع ہوگا۔ میچ کی تیاری کےلئے سری لنکن ٹیم نے پریکٹس سیشن کیا۔کھلاڑیوں نے کوچز کی زیرنگرانی فیلڈنگ اور نیٹ سیشن میں حصہ لیا
پاکستان اور سری لنکا کے درمیان دوسرا ایک روزہ میچ 13جبکہ تیسرا اور آخری میچ15نومبر کو کھیلا جائےگا۔ سیریز کےلئے میچ آفیشلز کا بھی اعلان کردیا گیا۔
============================
کراچی کو صاف پانی فراہم کرنا حکومت کی اولین ترجیح ہے، وزیراعلیٰ سندھ
عزیز بھٹی پارک سے اردو یونیورسٹی تک پانی کی پائپ لائن بچھانے کےلیے روڈ بند کیا گیا ہے، وزیراعلیٰ
پائپ لائن کا کام مکمل ہوتے ہی سڑک بحال کردی جائے گی، وزیراعلیٰ سندھ
وقتی مشکلات طویل مدتی فوائد کی راہ ہموار کریں گی، وزیراعلیٰ مراد علی شاہ
وزیراعلیٰ سندھ کی ٹریفک پولیس کو متبادل راستے فراہم کرنے کی ہدایت
کراچی (10 نومبر): وزیراعلیٰ سندھ سید مراد علی شاہ نے کہا ہے کہ ریڈ لائن منصوبے پر بھی کام جاری ہے، اس لیے کے فور منصوبے کے تحت پانی کی پائپ لائن اسی راستے کے ساتھ پہلے سے بچھائی جا رہی ہے تاکہ بار بار سڑکوں کی کھدائی سے بچا جا سکے۔
انہوں نے کہا کہ کے فور منصوبہ کراچی کے طویل مدتی پانی کے مسائل کے حل کی جانب ایک اہم قدم ہے۔ وزیراعلیٰ مراد علی شاہ نے وزیراعلیٰ ہاؤس سے جاری بیان میں کہا کہ کراچی کے عوام کو صاف اور وافر مقدار میں پانی فراہم کرنا سندھ حکومت کی اولین ترجیح ہے۔
کے فور منصوبے کے تحت تعمیراتی کام عزیز بھٹی پارک سے اردو یونیورسٹی تک جاری ہے جہاں صرف 300 میٹر کا حصہ عارضی طور پر بند ہے۔ وزیراعلیٰ نے ہدایت کی ہے کہ عوام کی سہولت کے لیے اس دوران متبادل راستے فراہم کیے جائیں۔
انہوں نے کہا کہ جیسے ہی عزیز بھٹی پارک سے اردو یونیورسٹی تک کا حصہ مکمل ہوگا، سڑک بحال کر دی جائے گی اور کام اگلے مرحلے کی جانب بڑھایا جائے گا۔ عزیز بھٹی پارک سے حسن اسکوائر تک 9.6 اور 7.2 انچ قطر کی پانی کی پائپ لائنیں بچھائی جا رہی ہیں جو مستقبل میں شہر کی بڑھتی ہوئی ضروریات کو پورا کریں گی۔
وزیراعلیٰ نے کہا کہ ریڈ لائن منصوبے کے ساتھ ساتھ پائپ لائن بچھانے کا مقصد بار بار کھدائی سے عوامی مشکلات کو کم کرنا ہے۔
انہوں نے بتایا کہ یہ پائپ لائن بحریہ ٹاؤن میں زیر تعمیر واٹر فلٹریشن پلانٹ سے گل بائی تک بچھائی جا رہی ہے۔ عزیز بھٹی پارک سے اردو یونیورسٹی تک سڑک کی بندش کے باعث ٹریفک میں عارضی رکاوٹ کا امکان ہے۔ وزیراعلیٰ نے ٹریفک پولیس کو ہدایت دی کہ شہریوں کی رہنمائی کریں اور خاص طور پر صبح و شام کے مصروف اوقات میں ٹریفک کی روانی یقینی بنائیں۔
انہوں نے کہا کہ منصوبے کے دوران عوامی سہولت کو ہر ممکن حد تک یقینی بنایا جائے اور شہریوں سے اپیل کی کہ وہ متبادل راستوں کا استعمال کرتے ہوئے تعاون کریں۔
وزیراعلیٰ نے کہا کہ یہ وقتی مشکلات طویل مدتی فوائد کی راہ ہموار کریں گی۔ کے۔فور کا یہ اہم منصوبہ تیزی سے مکمل کیا جائے گا اور واٹر بورڈ سے طے شدہ شیڈول کے مطابق کام کی سخت نگرانی کی جائے گی۔ انہوں نے کہا کہ سندھ حکومت جاری ترقیاتی کاموں سے عوام کو پیش آنے والی کسی بھی تکلیف پر معذرت خواہ ہے اور کراچی کو جدید سہولیات سے آراستہ شہر بنانے کے عزم کا اعادہ کرتی ہے۔
عبدالرشید چنا
میڈیا کنسلٹنت، وزیراعلیٰ سندھ
وزیراعلیٰ سندھ مراد علی شاہ کا ماہر تعلیم ڈاکٹر عارفہ سیدہ زہرہ کے انتقال پر اظہار افسوس
ڈاکٹر عارفہ صرف علم نہیں تربیت پر بھی زور دیتی تھیں، وزیراعلیٰ سندھ
کراچی (10 نومبر): وزیراعلیٰ سندھ سید مراد علی شاہ نے معروف ماہرِ تعلیم ڈاکٹر عارفہ سیدہ زہرہ کے انتقال پر گہرے دکھ اور افسوس کا اظہار کیا ہے۔ انہوں نے تعلیم کے شعبے میں ان کی نمایاں خدمات کو خراجِ تحسین پیش کیا۔
ڈاکٹر عارفہ سیدہ زہرہ نے اپنی پوری زندگی تعلیم کے فروغ اور اس کے مقصد سے عوام کو روشناس کرانے کے لیے وقف کی۔ وہ ایسی دانشور تھیں جو صرف علم نہیں بلکہ تربیت پر بھی زور دیتی تھیں۔
وزیراعلیٰ کے مطابق ڈاکٹر عارفہ کا ماننا تھا کہ تعلیم اگر انسانیت کی رہنمائی نہ کرے تو وہ بے معنی ہے اور علم اس وقت تک اپنا مقصد پورا نہیں کرتا جب تک وہ انسان کی شخصیت کو تشکیل نہ دے۔
مراد علی شاہ نے کہا کہ پاکستان کو ڈاکٹر عارفہ جیسی مزید ماہرینِ تعلیم اور عظیم اساتذہ کی ضرورت ہے۔ ان کا خلا پُر نہیں کیا جا سکتا، تاہم ان کے سنہری خیالات قوم کے لیے ہمیشہ رہنمائی کا ذریعہ رہیں گے۔
انہوں نے مزید کہا کہ ڈاکٹر عارفہ سیدہ زہرہ نے اردو زبان، تعلیم اور سماجی شعور کے فروغ میں نمایاں کردار ادا کیا۔
وزیراعلیٰ نے مرحومہ کی مغفرت کے لیے دعا کی اور ان کے اہلِ خانہ سے دلی تعزیت کا اظہار کرتے ہوئے صبر و حوصلے کی دعا کی۔
عبدالرشید چنا
میڈیا کنسلٹنٹ، وزیراعلیٰ سندھ
