اسپیشل انویسٹمنٹ فیسلیٹیشن کونسل کی معاونت سے پاکستان نے ڈیجیٹل ترقی کی جانب ایک بڑا قدم اٹھا لیا ہے۔ حکومتِ پاکستان، گوگل، ٹیک ویلی اور نیشنل ریڈیو اینڈ ٹیلی کمیونیکیشن کارپوریشن کے اشتراک سے ملک کی پہلی کروم بک اسمبلی لائن کا افتتاح کر دیا گیا ہے۔
اس منصوبے کے تحت 2026 سے مقامی سطح پر سالانہ پانچ لاکھ کروم بکس تیار کیے جائیں گے جو اساتذہ اور طلبہ کے لیے جدید تعلیمی ضروریات کو پورا کریں گے۔
نائب وزیراعظم اور وزیرِ خزانہ اسحاق ڈار نے تقریب سے خطاب کرتے ہوئے کہا کہ “ریگولیٹری فریم ورک کے تحت نئی پالیسی کا مقصد پاکستان کو ٹیک ڈیولپمنٹ کے لیے علاقائی مرکز بنانا ہے۔” انہوں نے مزید کہا کہ گوگل کے ساتھ اسٹریٹجک شراکت داری کے تحت ایک لاکھ ڈویلپرز کو فنی تربیت دی جائے گی، جس سے ملک کی ڈیجیٹل استعداد میں نمایاں اضافہ ہوگا۔
اسحاق ڈار کے مطابق، “’اے آئی لیڈرز فیلوشپ پروگرام‘ کے تحت ملک کے 100 اداروں کو مصنوعی ذہانت کے مؤثر استعمال میں مدد فراہم کی جائے گی۔”
اس منصوبے کا مقصد نہ صرف مقامی سطح پر تیار شدہ سستے اور محفوظ کروم بکس کی فراہمی ہے بلکہ صنعتی ترقی کو فروغ دینا اور نوجوانوں کے لیے روزگار کے نئے مواقع پیدا کرنا بھی ہے۔
وفاقی وزیر آئی ٹی شزہ فاطمہ خواجہ نے کہا کہ “ایک سال کے اندر مکمل اسمبلی لائن کا قیام اور عالمی کمپنی کا پاکستان میں سرمایہ کاری کا اعلان ملکی ڈیجیٹل معیشت کے لیے اہم سنگ میل ہے۔”
انہوں نے مزید کہا کہ “پاکستان میں گوگل کی موجودگی ڈیجیٹل معیشت کی مضبوطی اور ٹیکنالوجی کے فروغ کے لیے نہایت اہم ہے۔”
اقتصادی ماہرین کے مطابق، موبائل ایپس، ڈیجیٹل سروسز اور ای کامرس کے فروغ سے 2030 تک پاکستان کی سالانہ برآمدات 6.6 ارب ڈالرز تک پہنچنے کی توقع ہے۔
