یمن کے جنوبی صوبے ابین کی العرقوب شاہراہ پر مسافر بس اور فوکسی برانڈ کی ایک گاڑی میں ہولناک حادثہ پیش آیا ہے جس کے نتیجے میں 34 مسافر زندہ جل گئے۔
غیر ملکی میڈیا رپورٹس کے مطابق گاڑیوں میں تصادم کے بعد مسافر بس میں آگ بھڑک اٹھی اور دیکھتے ہی دیکھتے پوری بس کو اپنی لپیٹ میں لے لیا۔
رپورٹس کے مطابق آگ کی شدت کے باعث مسافر باہر بھی نہ نکل سکے اور موت کی وادی میں پہنچ گئے۔
اطلاعات ہیں کہ بس سعودی شہر جدہ سے مسافروں کو لے کر یمن جا رہی تھی۔ جب کہ 7 خوش قسمت مسافر ایک اسٹاپ پہلے اتر گئے تھے۔
رپورٹس کے مطابق حادثے کے ذمہ دار ڈرائیور کا تعین نہیں ہوسکا ہے، ٹریفک پولیس نے ایک انکوائری کمیٹی تشکیل دیدی ہے۔
اس سے قبل جنوبی سعودی عرب میں بیشا خمیس مشیط روڈ پر ایک خوفناک ٹریفک حادثہ رونما ہوا تھا جس میں چار طالبات جاں بحق ہوگئیں تھیں۔
طالبات بیشا میں اسکول جا رہی تھیں کہ ان کی گاڑی خوفناک تصادم کا شکار ہو گئی۔ حادثے کی اطلاع ملتے ہی ریسکیو ٹیمیں بشمول سیکیورٹی فورسز، ہلال احمر اور سول ڈیفنس کی ٹیمیں جائے وقوعہ پر پہنچ گئیں۔
پانچویں طالبہ کو بیشا کے کنگ عبداللہ اسپتال منتقل کیا گیا جہاں وہ انتہائی طبی نگہداشت میں ہے اور اس کی حالت تشویشناک ہے۔
