پاکستان میں سال کے سب سے بڑے سپر مون ’’بیور سپر مون‘‘ کا نظارہ کیا گیا۔
سپارکو کے ترجمان نے بتایا کہ یہ سال کا دوسرا سپر مون ہے، جبکہ تیسرا اور آخری سپر مون دسمبر میں دیکھا جائے گا۔ ترجمان کے مطابق اس دوران چاند کا زمین سے فاصلہ تقریباً 2 لاکھ 21 ہزار 817 میل رہ گیا، جس کی وجہ سے وہ عام دنوں کے مقابلے میں 9.7 فیصد بڑا اور 16 فیصد زیادہ روشن دکھائی دیا۔
ماہرین فلکیات کے مطابق، سپر مون اس وقت وقوع پذیر ہوتا ہے جب چاند اپنی مکمل حالت میں زمین کے قریب ترین نقطے پر ہوتا ہے۔
سپارکو کے مطابق، عام طور پر سپر مون ایک معمول کے فل مون کے مقابلے میں 14 فیصد تک بڑا اور30 فیصد تک زیادہ روشن نظر آتا ہے، تاہم اس بار یہ اضافہ نسبتاً کم مگر بصری لحاظ سے نہایت نمایاں رہا۔
پاکستان کے مختلف شہروں میں شہریوں نے یہ دل موہ لینے والا منظر دیکھنے کے لیے چھتوں، پارکوں اور کھلے مقامات کا رخ کیا۔ لاہور، کراچی، اسلام آباد، کوئٹہ اور پشاور سے موصول ہونے والی تصاویر میں آسمان پر چاند کو غیر معمولی چمک کے ساتھ دیکھا گیا۔
ماہرین کا کہنا ہے کہ ’’بیور سپر مون‘‘ کو یہ نام شمالی امریکا کی قدیم روایات سے منسوب ہے، جب نومبر کے مہینے میں بیورز (ایک قسم کے آبی جانور) اپنی سرگرمیوں میں مصروف ہوتے ہیں۔ تاہم اس بار قمری کیلنڈر کی ترتیب کے باعث یہ مظہر اکتوبر میں رونما ہوا۔
فلکیاتی ماہرین کے مطابق اگلا سپر مون دسمبر میں دکھائی دے گا، جو 2025 کا تیسرا اور آخری سپر مون ہوگا۔
