ڈپٹی اسپیکر قومی اسمبلی اور قومی اسمبلی میں پاکستان۔جرمنی فرینڈشپ گروپ کے کنوینر سید غلام مصطفیٰ شاہ سے جرمن پارلیمنٹ کی رکن محترمہ Derya Türk-Nachbaur اور پاکستان میں تعینات جرمنی کی سفیر محترمہ Ina Lepel نے ملاقات کی۔ ملاقات میں پاکستان اور جرمنی کے درمیان پارلیمانی تعلقات، اقتصادی تعاون اور دوطرفہ اشتراک کے فروغ سے متعلق امور پر تبادلۂ خیال کیا گیا۔
ڈپٹی اسپیکر قومی اسمبلی نے وفد کا خیرمقدم کرتے ہوئے کہا کہ پاکستان، جرمنی کے ساتھ اپنے دیرینہ تعلقات کو قدر کی نگاہ سے دیکھتا ہے۔ انہوں نے کہا کہ جرمنی پاکستان کا قابلِ اعتماد شراکت دار ہے جس نے تعلیم، توانائی، ماحولیات، ہنرمندی کی تربیت اور صنعتی ترقی کے شعبوں میں نمایاں تعاون کیا ہے۔
ڈپٹی اسپیکر نے کہا کہ پاکستان دونوں ممالک کے درمیان پارلیمانی روابط کو مزید مضبوط بنانے کا خواہاں ہے۔ انہوں نے کہا کہ پاکستان۔جرمنی پارلیمانی فرینڈشپ گروپ دونوں ممالک کے پارلیمانی نمائندگان کو قریب لانے میں اہم کردار ادا کر رہا ہے۔ انہوں نے مزید کہا کہ اس گروپ کے ذریعے دونوں پارلیمانوں کے ارکان کے درمیان براہِ راست رابطہ کاری سے دوطرفہ تعلقات میں مزید وسعت پیدا ہوگی۔
انہوں نے کہا کہ پاکستان، جرمنی کے ساتھ تجارتی تعلقات کو وسعت دینے کا خواہاں ہے اور صنعت، سرمایہ کاری، قابلِ تجدید توانائی اور تکنیکی تربیت کے شعبوں میں تعاون کو فروغ دینے کی ضرورت ہے۔ انہوں نے زور دیا کہ دونوں ممالک کے پارلیمانی وفود کے باہمی تبادلوں سے عوامی سطح پر تعلقات میں مزید بہتری آئے گی۔
جرمن رکنِ پارلیمان محترمہ Derya Türk-Nachbaur نے پاکستان کی پارلیمنٹ کے ساتھ تعاون جاری رکھنے کے عزم کا اظہار کرتے ہوئے کہا کہ جرمنی پارلیمانی سفارت کاری کو نہایت اہم سمجھتا ہے اور پاکستان کے ساتھ ہر ممکن اشتراک جاری رکھے گا۔
جرمنی کی سفیر محترمہ Ina Lepel نے بھی دونوں ممالک کے درمیان اقتصادی اور پارلیمانی روابط کو مزید مستحکم کرنے کے عزم کا اعادہ کیا۔
ڈپٹی اسپیکر سید غلام مصطفیٰ شاہ نے وفد کا شکریہ ادا کرتے ہوئے امید ظاہر کی کہ یہ ملاقات دونوں ممالک کے تعلقات میں نئے باب کا آغاز ثابت ہوگی۔
Syed Mir Ghullam Mustafa Shah
Directorate of Electronic Media and Publications – Government of Pakistan
Ministry of Foreign Affairs, Islamabad
Radio Pakistan
PTV News
