دہشتگردی کے بڑھتے خطرات کے پیشِ نظر محکمہ ریلوے نے ٹرینوں اور مسافروں کے تحفظ کے لیے اہم فیصلہ کر لیا ہے۔ ملک بھر میں ریلوے نیٹ ورک کو محفوظ بنانے کے لیے ٹرینوں میں جدید جیمرز نصب کرنے کا منصوبہ تیار کر لیا گیا ہے۔
حکام کے مطابق ہر ٹرین میں تین جیمرز لگائے جائیں گے تاکہ کسی بھی ریموٹ کنٹرول بم یا دہشتگردانہ حملے کو ناکام بنایا جا سکے۔ اس کے ساتھ ساتھ حساس ریلوے روٹس پر سیکیورٹی گشت بڑھانے کی بھی ہدایت جاری کی گئی ہے تاکہ کسی ممکنہ خطرے کا بروقت مقابلہ کیا جا سکے۔
یہ فیصلہ قومی اسمبلی کی قائمہ کمیٹی برائے ریلوے کے اجلاس میں کیا گیا، جو سات اکتوبر کو جعفر ایکسپریس پر ہونے والے دہشتگردی کے واقعے کے بعد بلایا گیا تھا۔ اجلاس میں ریلوے کی زمینوں پر قابض مافیا کے خلاف سخت کارروائی کی سفارش بھی کی گئی۔
اعداد و شمار کے مطابق ریلوے کے زیرِ استعمال 16 ہزار ایکڑ میں سے تقریباً 3 ہزار 253 ایکڑ زمین پر مختلف قبضے ہیں، جن میں سے 457 ایکڑ بااثر افراد کے زیرِ تسلط ہے۔ حکام کا کہنا ہے کہ آئندہ ہفتوں میں ان قبضوں کے خاتمے کے لیے بڑے پیمانے پر آپریشن شروع کیا جائے گا۔
