دنیا کے مقبول ٹک ٹاک اسٹار خابی لیم کے انتقال کے حوالے سے پھیلائی گئی خبریں بے بنیاد ثابت ہو گئیں۔ حالیہ دنوں سوشل میڈیا پر متعدد پوسٹس وائرل ہوئیں جن میں دعویٰ کیا گیا تھا کہ خابی لیم ایک کار حادثے میں ہلاک ہو گئے ہیں۔
یہ افواہیں یوٹیوب، فیس بک اور ایکس جیسے مختلف پلیٹ فارمز پر تیزی سے پھیلیں، اور کچھ جعلی پوسٹس میں ایک تباہ شدہ گاڑی کی تصاویر بھی شیئر کی گئیں جنہیں غلط طور پر خابی لیم سے منسوب کیا گیا۔
بعد ازاں متعدد معتبر فیکٹ چیکنگ اداروں، جن میں رائٹرز اور اسنوپس شامل ہیں، نے تصدیق کی کہ خابی لیم کسی بھی حادثے کا شکار نہیں ہوئے۔ یہ تمام دعوے جھوٹے اور کلک بیٹ ویب سائٹس اور فشنگ لنکس کے ذریعے پھیلائے گئے تھے۔
خابی لیم کے قریبی ذرائع نے بھی تصدیق کی کہ وہ زندہ اور خیریت سے ہیں۔
یاد رہے کہ خابی لیم، جو سینیگال میں پیدا اور اٹلی میں پروان چڑھے، نے 2020 میں کورونا وبا کے دوران اپنی نوکری کھونے کے بعد ٹک ٹاک پر مختصر مزاحیہ ویڈیوز کے ذریعے شہرت حاصل کی۔ وہ بغیر بولے طنزیہ انداز میں روزمرہ زندگی کے مسائل پر ویڈیوز بنانے کے لیے مشہور ہیں اور ان کے 160 ملین سے زائد فالوورز موجود ہیں۔
