رپورٹ محمد عاشق پٹھان پاکستان پیپلزپارٹی کے چیئرمین بلاول بھٹو زرداری نے کہا ہے کہ سیلاب متاثرین کے لیے حکومت سندھ اور پیپلز پارٹی کی جانب سے نیا منصوبہ شروع کیا جارہا ہے جس کے تحت متاثرین کو مفت سولر اور گھروں میں واش روم بناکے دیئے جائیں گے، ان خیالات کا اظہار انہوں نے ہفتے کے روز تعلقہ رتوڈیرو کی یونین کونسل وارث ڈنو میں خیرمحمد بروہی میں سیلاب متاثرین کیلئے سندھ پیپلزہاؤسنگ کے تحت بننے والے مکمل اور زیرتعمیر گھروں کے دورہ اور مالکانہ اسناد دینے کی تقریب کے دوران متاثرین سے بات چیت کرتے ہوئے کہا، انہوں نے مزید کہا کہ شہید محترمہ بے نظیر بھٹو کا وعدہ تھا کہ وہ عوام کو روٹی، کپڑا اور مکان دیں گی، تو مجھے یہ دیکھ کر بہت خوشی ہے کہ پیپلز پارٹی کی سندھ حکومت اس وعدے کو پورا کررہی ہے اور یہاں سب کے گھر تعمیر ہوچکے ہیں یا تعمیر ہورہے ہیں، اس کے ساتھ اہم بات یہ ہے کہ ہماری کوشش ہے کہ خاص طور پر خواتین کے نام پر ان گھروں کے مالکانہ حق دیے جائیں، انہوں نے کہا کہ یہ بھی شہید محترمہ بے نظیر بھٹو کا وعدہ تھا اور وہ اپنی بیٹوں اور بیٹیوں کا خیال رکھتی تھیں، پیپلز پارٹی کی یہ کوشش ہے کہ ہم بھی آپ کا اسی طرح خیال رکھیں، میں چاہتا ہوں کہ ہم جلد از جلد گھروں کی تعمیر مکمل کریں، اس کے ساتھ ساتھ سندھ حکومت ایک نئے منصوبے پر بھی کام کررہی ہے، ہماری کوشش ہوگی کہ جو گھر بن رہے ہیں
ان گھروں کو سولر کی سہولت بھی فراہم کریں، انہوں نے کہا کہ سندھ حکومت کا ایک اور بڑا منصوبہ شروع ہونے والا ہے جس کے تحت ہم ان گھروں میں واش کی سہولت بھی شامل کریں گے، اس کے لیے پاکستان پیپلز پارٹی کی یہ کوشش ہوگی کہ پورے سندھ میں جہاں جہاں ہم نے نئے گھر تعمیر کرائے ہیں وہاں ہم نہ صرف سولر کی سہولت دیں بلکہ ساتھ ساتھ واش کی سہولت بھی فراہم کریں تاکہ متاثرین کی مشکلات میں کمی آئے، یہ سب کام متاثرین کے لیے جاری ہیں، آپ سب کو مبارک ہو، یہ منصوبہ بہت جلد مکمل ہوجائے گا،
اس موقع پر پی پی پی سندھ کے صدر ایم پی اے نثار کھوڑو، پی پی پی ڈویزن لاڑکانہ کے صدر میر اعجاز جکھرانی، جنرل سیکریٹری عبدالفتاح بھٹو، پی پی پی ضلع لاڑکانہ کے صدر ایم این اے خورشید احمد جونیجو، ایم این اے رمیش لعل، ایم پی اے لاڑکانہ جمیل احمد سومرو، ایم پی اے سہیل انور سیال، اور دیگر بھی موجود تھے، دورے کے دوران چیئرمین بلاول بھٹو زرداری گاؤں خیرمحمد بروہی کے مختلف گھروں میں جاکر مکینوں سے حال احوال دریافت کرتے رہے، بلاول بھٹو زرداری کو گاؤں خیر محمد بروہی کے مکینوں نے اپنے مسائل سے بھی آگاہ کیا جس پر بلاول بھٹو زرداری نے گاؤں خیر محمد بروہی کے مکینوں کے مسائل کے حل کے لئے فوری ہدایات جاری کیں، اس سے قبل پاکستان پیپلزپارٹی کے چیئرمین بلاول بھٹو زرداری تعلقہ رتوڈیرو کے گاؤں زنگیجا پہنچے جہاں انہوں نے پی پی پی شعبہ خواتین کی مرکزی صدر فریال تالپور کے ہمراہ شہید پولیس سپاہی کی رہائش گاہ پہنچ کر شہید کانسٹیبل منیر احمد سومرو کے صاحبزادے منیب الرحمان اور والد غلام قادر ودیگر ورثاء سے تعزیت کی، اس موقع پر ایس ایس پی لاڑکانہ احمد فیصل چوہدری نے انہیں بریفنگ دیتے ہوئے بتایا کہ جرائم پیشہ افراد کا بہادری سے مقابلہ کرتے ہوئے کانسٹیبل منیر احمد سومرو نے جام شہادت نوش کیا۔
https://www.youtube.com/watch?v=5uur1wv4yi
