راولپنڈی اور اسلام آباد میں پیش آنے والے دل دہلا دینے والے واقعے میں ایک شخص نے اپنے والد، دو بہنوں کو قتل کر دیا جبکہ شیر خوار بھانجا شدید زخمی ہوگیا۔ پولیس کے مطابق ملزم نے پہلے اسلام آباد کے ترامڑی چوک میں اپنے 70 سالہ والد محمود حسین اور 32 سالہ بہن شبنم زارا کو تیز دھار آلے سے قتل کیا۔ بعد ازاں وہ راولپنڈی کے عرفان آباد، اڈیالہ روڈ پہنچا جہاں 35 سالہ بہن انجم زارا کو قتل اور اس کے تین ماہ کے بیٹے سالار کو ذبح کرنے کی کوشش کی، جس سے بچہ نازک حالت میں اسپتال منتقل کیا گیا۔
پولیس نے فوری کارروائی کرتے ہوئے ملزم محمد علی کو گرفتار کر کے آلۂ قتل برآمد کر لیا۔ ابتدائی تحقیقات میں معلوم ہوا کہ ملزم کو مقتولہ انجم زارا کی پسند کی شادی پر شدید اعتراض تھا، جبکہ بعض ذرائع کا کہنا ہے کہ اصل وجہ جائیداد کا تنازعہ ہے۔ اطلاعات کے مطابق مقتول والد اپنی جائیداد دونوں بیٹیوں کے نام کرنا چاہتے تھے، جس پر ملزم ناراض تھا۔
واقعے کے بعد ایس پی صدر، اے ایس پی صدر اور پولیس کی بھاری نفری جائے وقوعہ پر پہنچ گئی۔ پولیس کے مطابق تین افراد کے قتل کی اس واردات پر دو الگ مقدمات درج ہوں گے—ایک اسلام آباد کے تھانہ شہزاد ٹاؤن میں اور دوسرا راولپنڈی کے تھانہ صدر بیرونی میں۔
ذرائع کے مطابق ملزم بڑی بہن کو قتل کرنے کے بعد بہنوئی کے انتظار میں گھر میں بیٹھا رہا، تاہم اہل علاقہ نے مقتولہ کے شوہر کو اندر جانے سے روکا، اور اسی دوران پولیس نے موقع پر پہنچ کر ملزم کو حراست میں لے لیا۔ ترجمان راولپنڈی پولیس کا کہنا ہے کہ شواہد اکٹھے کیے جا رہے ہیں اور ملزم کو ٹھوس ثبوتوں کے ساتھ عدالت میں پیش کر کے قرار واقعی سزا دلائی جائے گی۔
