اسلام آباد میں موسلادھار بارش کے باعث مارگلہ پہاڑیوں سے بہنے والے پانی کی وجہ سے وفاقی دارالحکومت کے نالے طغیانی کا شکار ہوگئے۔ شدید بارش کے نتیجے میں بھارہ کہو، چک شہزاد اور دیگر علاقوں میں پانی گھروں میں داخل ہوگیا جبکہ نیو چھٹہ بختاور کی گلیاں اور سڑکیں تالاب کی صورت اختیار کر گئیں جس سے مقامی رہائشیوں کو شدید مشکلات کا سامنا کرنا پڑا۔
نجی ٹی وی رپورٹس کے مطابق بارش کے پانی میں کئی گاڑیاں ڈوب گئیں اور 6 سے 7 نجی ہاؤسنگ سوسائٹیز متاثر ہونے کا خدشہ ظاہر کیا گیا ہے۔ گزشتہ رات بارش کے سبب راول ڈیم میں پانی کی سطح بڑھ گئی جس کے باعث سپل ویز کھول دیے گئے۔ ضلعی انتظامیہ نے شہریوں کو ندی نالوں سے دور رہنے کی ہدایت جاری کی ہے۔
دوسری جانب، نیلم آزاد کشمیر میں بارش اور لینڈ سلائیڈنگ کی وجہ سے پھنسے ہوئے 10 سیاحوں کو بحفاظت نکال لیا گیا۔ یہ واقعہ بالائی وادی نیلم کے جمگر علاقے میں پیش آیا جہاں لینڈ سلائیڈنگ نے راستے بند کر دیے تھے۔ پولیس تھانہ نیلم، چوکی جانوئی اور ضلعی انتظامیہ نے بروقت کارروائی کرتے ہوئے سیاحوں کو محفوظ مقام پر منتقل کیا اور مقامی گھروں میں پناہ دی۔ سیاحوں نے پولیس، پاک فوج اور مقامی افراد کی مدد کو سراہا اور ان کا شکریہ ادا کیا۔
ضلعی انتظامیہ نے سیاحوں کو بارش اور لینڈ سلائیڈنگ کے دوران احتیاطی تدابیر اختیار کرنے کی ہدایت بھی جاری کی ہے تاکہ کسی بھی ناگہانی حادثے سے بچا جا سکے۔
ملک کے مختلف حصوں میں بارشوں کا سلسلہ جاری ہے، محکمہ موسمیات نے پنجاب، خیبرپختونخوا، اور کشمیر میں تیز ہواؤں اور گرج چمک کے ساتھ مزید بارش کی پیشگوئی کی ہے۔
موسلادھار بارش کی وجہ سے اسلام آباد، راولپنڈی، گوجرانوالہ، لاہور اور سیالکوٹ کے نشیبی علاقے زیر آب آنے کا خدشہ ہے۔ مظفرآباد میں وقفے وقفے سے بارش کے باعث موسم خوشگوار ہے۔
محکمہ موسمیات کے مطابق خیبرپختونخوا کے پہاڑی علاقوں، گلگت بلتستان، کشمیر، مری اور گلیات میں لینڈ سلائیڈنگ کے باعث ٹریفک متاثر ہونے کا اندیشہ ہے جبکہ بلوچستان کے مختلف حصوں میں بھی بارش کی توقع ہے۔
کراچی میں بھی موسم ابر آلود رہنے اور ہلکی بوندا باندی کے امکانات ظاہر کیے گئے ہیں۔ فلڈ فورکاسٹنگ ڈویژن کے مطابق شدید بارشوں کی وجہ سے دریائے چناب اور جہلم میں بلند سطح کا سیلاب آ سکتا ہے جبکہ دریائے سندھ کے گڈو اور سکھر بیراج پر کم درجے کا سیلاب موجود ہے۔
