سعودی عرب کے شہر طائف میں واقع ایک تفریحی مقام پر افسوسناک واقعہ پیش آیا جہاں جھولا اچانک گرنے کے باعث 23 افراد زخمی ہو گئے۔ خلیج ٹائمز کے مطابق یہ حادثہ طائف کے نواحی علاقے ہدہ میں موجود گرین ماؤنٹین پارک میں پیش آیا، جب ایک جھولا تکنیکی خرابی کے باعث چلتے چلتے ٹوٹ کر زمین پر آ گرا۔
واقعے کی ویڈیوز سوشل میڈیا پر تیزی سے وائرل ہو رہی ہیں جن میں جھولے پر سوار نوجوان مرد و خواتین کو حادثے سے پہلے خوشی کے عالم میں دیکھا جا سکتا ہے۔ جھولا ہنسی خوشی کے مناظر کے درمیان جھوم رہا تھا کہ اچانک درمیان سے ٹوٹ گیا، جس سے شدید چیخ و پکار سنائی دی۔
حادثے میں زخمی ہونے والے افراد کو فوری طور پر قریبی اسپتالوں میں منتقل کیا گیا، جن میں سے تین افراد کی حالت تشویشناک بتائی جا رہی ہے۔ حادثے کے بعد طائف کے مختلف اسپتالوں میں ایمرجنسی نافذ کر دی گئی۔ ریسکیو اور سیکیورٹی ادارے فوری طور پر جائے وقوعہ پر پہنچے اور امدادی کارروائیاں شروع کیں۔
حکام نے اس افسوسناک واقعے کی جامع تحقیقات کا آغاز کر دیا ہے تاکہ جھولے کی خرابی کی اصل وجہ معلوم کی جا سکے اور آئندہ ایسے واقعات سے بچاؤ ممکن بنایا جا سکے۔
