وفاقی دارالحکومت اسلام آباد میں لگائی جانے والی ایک نئی یادگار نے عوام کی توجہ اپنی طرف کھینچ لی ہے اور سوشل میڈیا پر اس کے بارے میں مختلف آراء اور تبصرے سامنے آرہے ہیں۔ تفصیلات کے مطابق اسلام آباد انتظامیہ نے حالیہ دنوں میں مارگلہ ایونیو کے راؤنڈ اباؤٹ پر یہ منفرد یادگار نصب کی ہے، جس کے بارے میں حکام کا کہنا ہے کہ اس سے شہر کی خوبصورتی میں اضافہ ہوگا۔
اس فن پارے میں سنہری رنگ کے دو انسانی ہاتھ بلند ہوتے ہوئے دکھائی دیتے ہیں، جن کے درمیان ایک سفید گیند نما شے رکھی گئی ہے۔ اس منفرد ڈیزائن پر شہریوں نے دلچسپ اور سوالیہ تبصرے کرنا شروع کر دیے ہیں۔ ایک صارف رضوان غلزئی نے طنزیہ سوال کیا: ’’یہ کس کا تخلیقی وژن ہے؟‘‘
اسی سلسلے میں معروف اینکر نادیہ مرزا نے بھی اظہارِ خیال کیا اور کہا کہ ’’آج دفتر آتے ہوئے یہ نیا فن پارہ دیکھا مگر کچھ سمجھ نہ آیا، نہ ہی آنکھوں کو بھایا، یہ آخر ہے کیا؟‘‘
کچھ شہریوں نے اس یادگار کو مثبت پیغام قرار دیتے ہوئے کہا کہ ’’یہ ہاتھ اس بات کی علامت ہیں کہ پاکستان کے ہاتھ مضبوط ہیں، یہ کسی کے سامنے نہیں جھک سکتے اور نہ ہی کسی سے خیرات مانگ سکتے ہیں۔‘‘
صحافی نادر بلوچ نے انکشاف کیا ہے کہ حکومت نے اس یادگار کی تنصیب کا کام اچانک روک دیا ہے اور اس پر میڈیا کوریج پر بھی پابندی لگا دی گئی ہے، تاہم اس فیصلے کی کوئی وجہ سامنے نہیں لائی گئی۔
ایک اور صارف نے رائے دی کہ ’’یہ حکومت کا منفرد منصوبہ ہے، اس کو مکمل کیا جانا چاہیے۔ میڈیا کوریج روکنا عجیب فیصلہ ہے کیونکہ اس مجسمے کا پیغام آنے والی نسلوں تک پہنچانا ضروری ہے۔ اس سے ظاہر ہوتا ہے کہ پوری دنیا ہمارے ہاتھوں میں ہے اور یہی کسی بھی قوم کا خواب ہوتا ہے۔‘‘
