راولپنڈی کے تھانہ روات کے علاقے میں 16 سالہ لڑکی کو ٹک ٹاک اکاؤنٹ نہ مٹانے پر باپ نے غیرت کے نام پر قتل کر دیا۔ پولیس نے مدعیت میں مقدمہ درج کر لیا ہے۔
پولیس رپورٹ کے مطابق ڈھوک چوہدریاں داخلی تخت پڑی، روات سے اطلاع ملی کہ اخلاق احمد نے اپنی بیٹی مہک شہزادی کو ٹک ٹاک اکاؤنٹ ڈیلیٹ کرنے کا کہا لیکن وہ ایسا نہ کر سکی۔ غصے میں آ کر اخلاق احمد نے اپنی بیٹی کو فائرنگ کرکے قتل کر دیا۔
ملزم نے فساد فی الارض کا ارتکاب کیا اور موقع سے فرار ہو گیا۔ پولیس کا کہنا ہے کہ ابتدائی طور پر اہل خانہ نے واقعے کو خودکشی ظاہر کرنے کی کوشش کی، لیکن تحقیقات کے بعد معاملہ قتل ثابت ہوا۔ لاش کا پوسٹ مارٹم کیا جا چکا ہے، ملزم کے خلاف مقدمہ درج کر کے موقع سے شواہد جمع کر لیے گئے ہیں اور تمام پہلوؤں سے تفتیش جاری ہے۔
