کراچی، 29 مئی 2025:
انسداد منشیات فورس (اے این ایف) سندھ کے زیر اہتمام 20ویں پوسٹر مقابلے کی نمائش سادیقین گیلری، فریر ہال کراچی میں منعقد ہوئی، جس کے مہمانِ خصوصی فورس کمانڈر ریجنل ڈائریکٹوریٹ اے این ایف سندھ، بریگیڈیئر عمر فاروق نے شرکت کی۔
اس نمائش میں مختلف اسکولوں کے طلبہ و طالبات نے منشیات کے خلاف اپنے تخلیقی خیالات کو فن پاروں کی صورت میں پیش کیا۔
اپنے خطاب میں بریگیڈیئر عمر فاروق نے طلبہ کی تخلیقی صلاحیتوں اور ان کے مضبوط پیغام کو سراہا۔ انہوں نے کہا:
“مجھے خوشی ہے کہ ہمارے نوجوان منشیات کے خلاف جدوجہد میں اپنی ذمہ داری کو سمجھ رہے ہیں اور اسے تخلیقی انداز میں اجاگر کر رہے ہیں۔”
انہوں نے کہا کہ اس قسم کی سرگرمیاں معاشرے میں مثبت پیغام عام کرنے میں اہم کردار ادا کرتی ہیں اور ان فن پاروں کو نہ صرف قومی سطح پر بلکہ بین الاقوامی سطح پر بھی اجاگر کیا جانا چاہیے۔
انہوں نے مزید کہا کہ “منشیات نہ صرف فرد کو بلکہ پورے معاشرے کو تباہ کرتی ہیں۔ ہمیں آگاہی کے ذریعے نئی نسل کو محفوظ اور صحت مند رکھنا ہوگا۔”
بریگیڈیئر عمر فاروق نے اعلان کیا کہ اے این ایف تمام شرکاء کو اس مقابلے میں شرکت پر تعریفی اسناد دے گی۔ انہوں نے اساتذہ اور طلبہ سے اپیل کی کہ 26 جون کو منائے جانے والے انسداد منشیات کے عالمی دن پر بھی اسی جذبے کے ساتھ اپنا کردار ادا کریں۔
آخر میں انہوں نے منتظمین، اساتذہ اور طلبہ کا شکریہ ادا کرتے ہوئے کہا
“طلبہ ہمارے ملک کا مستقبل ہیں، اور مجھے خوشی ہے کہ ہمارا مستقبل ذمہ دار اور باشعور ہاتھوں میں ہے۔”
انہوں نے نمائش کا دورہ بھی کیا اور طلبہ کے ساتھ گروپ فوٹو بنوایا۔
