جعلی پولیس اہلکار اسلحہ اور جعلی کارڈز سمیت گرفتار
کراچی(اسٹاف رپورٹر ) قائدآباد پولیس نے جعلی پولیس اہلکار سید زاہد کو نائن ایم ایم پستول، 29 راؤنڈز اور 5جعلی پولیس کارڈز سمیت گرفتار کر لیا،گرفتار ملزم نے دوران تفتیش بتایا کے وہ خود کو “خفیہ اہلکار” ظاہر کرکے شہریوں سے پولیس کے نام پر فائدے اٹھاتاتھا۔
منگھوپیر میں پلاٹ کے تنازع پر تصادم، ایک شخص جاں بحق، 5 افراد زخمی
24 مئی ، 2025FacebookTwitterWhatsapp
کراچی (اسٹاف رپورٹر )منگھوپیر اجتماع گاہ مہران سٹی مین پلاٹ کے تنازع پر متاثرین اور بلڈر کے مابین تصادم کے نتیجے میں فائرنگ ، لاٹھی، ڈنڈوں اور ، پتھراؤ سے42 سالہ ابو طالب ، 19 سالہ شعیب ولد محمد مفتی گل رسول ، 34سالہ محمد شاہ ولد گل شاہ ، 22سالہ غلام مصطفی ولد علی بخش ، 45سالہ شاہین خان ولد عالم دین اور 45سالہ منیر ولد راجمیل خان زخمی ہو گئے جنہیں عباسی شہید اسپتال منتقل کیا گیا ، زخمی ہونے والا ابو طالب دوران علاج دم توڑ گیا ، ایس ایچ او منگھوپیر عمران خان نے بتایا کہ واقعہ زمین کے تنازعہ پر پیش آیا، متاثرین اور بلڈر کے درمیان پرانا تنازعہ چل رہاہے، اس سے قبل بھی دونوں فریقین نے ایک دوسرے کے خلاف مقدمات درج کروائے ہوئے ہیں،ابو طالب دوران علاج دم توڑ گیا جبکہ دو افراد شعیب اور محمد شاہ گولی لگنے اور دیگر افراد پتھروں ، لاٹھی ڈنڈوں کے وار سے زخمی ہوئے، 223رائفل کی گولیوں کے چھ خول بر آمد کرکے قبضے میں لے کر دو مشتبہ افراد کو حراست میں لیا ہےواقعہ کا مقدمہ مقتول کے ورثاء کی مدعیت میں درج کیا جائےگا۔
گلشن معمار اور اورنگی میں شوہروں نے فائرنگ کرکے بیویاں قتل کر دیں
24 مئی ، 2025FacebookTwitterWhatsapp
کراچی( اسٹاف رپورٹر )گلشن معمار اور اورنگی ٹاؤن میں شوہر وں نے فائرنگ کر کے بیویاں قتل کر دیں ، تفصیلات کے مطابق گلشن معمار تھانے کی حدود ملا عیسیٰ گوٹھ چنا محلہ سے 22 سالہ اقصیٰ اسماعیل زوجہ اسماعیل کی گولی لگی لاش کو نجی اسپتال لایا گیا ،مقتولہ کو سر میں گولی مار کر قتل کیا گیا، پولیس کے مطابق مقتولہ کو اس کے شوہر اسماعیل چنا نے فائرنگ کر کے قتل کیا ہے جسے گرفتار کر لیا گیا ہے تاہم ملزم کا دعویٰ ہے کہ وہ اپنا لائسنس یافتہ پستول صاف کر رہا تھا کہ اتفاقاً گولی چل گئی جو اس کی بیوی کو لگی ،مقتولہ ملزم کی دوسری بیوی تھی اور اس نے چھ ماہ قبل اس سے شادی کی تھی، پہلی بیوی سے پانچ بچے ہیں ،واقعہ کے وقت گھر میں پہلی بیوی اس کے بچے اور ملزم کی والدہ بھی موجود تھے،واقعہ کا مقدمہ مقتولہ کی والدہ کی مدعیت میں درج کر لیا گیا ہے، مقتولہ کی والدہ کے مطابق گذشتہ شام بیٹی نے فون کرکے بتایا کہ اسماعیل اس پر تشدد کرتا ہے،گزشتہ رات بیٹی کے پڑوسیوں نے فون کرکے بتایا کہ اقصیٰ کو اس کے شوہر نے فائرنگ کرکے قتل کردیا ہے،میری بیٹی کے بازو سینے ،کندھے اور ٹانگ پر تشدد کے نشانات موجود تھے،دریں اثنا اورنگی ٹاؤن سیکٹر 10 آفریدی کالونی میں واقع مکان میں فائرنگ کے واقعہ میں 58 سالہ رخسانہ زوجہ گل شیرین زخمی ہو گئی جو عباسی شہید اسپتال میں دوران علاج وہ چل بسی، پولیس کے مطابق مقتولہ کو اس کے شوہر گل شیرین ولد زیارت گل نے جھگڑے کے دوران شک کی بناء پر تیس بور پستول سے فائرنگ کر کے زخمی کیا اور فرار ہو گیا،بعد ازاں مقتولہ اسپتال میں دم توڑ گئی ، مقتولہ کو گردن اور سینے پر تین گولیاں ماری گئی ہیں،مقتولہ 8 بچوں کی ماں تھی جن میں 6 بیٹیاں اور دو بیٹے شامل ہیں، ملزم کا آبائی تعلق مانسہرہ سے ہے۔
