کراچی: ڈیفنس کی رہائشی عمارت کی 25ویں منزل سے لڑکی گر کر جاں بحق
کراچی کے علاقے ڈیفنس فیز 8 میں رہائشی عمارت کی 25ویں منزل سے گر کر لڑکی جاں بحق ہوگئی۔
سینئر سپرنٹنڈنٹ آف پولیس (ایس ایس پی) ضلع جنوبی کا کہنا ہے کہ لڑکی کے والد کا بیان قلم بند کیا گیا ہے۔
لڑکی کے والد کا کہنا ہے کہ بیٹی کی دماغی حالت ٹھیک نہیں تھی، اس کا علاج جاری تھا، لڑکی نے اپنے کمرے کا دروازہ بند کرکے بالکونی سے چھلانگ لگائی۔
پولیس حکام کا کہنا ہے کہ لڑکی کی لاش کو ضابطے کی کارروائی کےلیے جناح اسپتال منتقل کر دیا گیا۔
=========================
ہائی ویز، اہم شاہراہیں فوری کھلوائی جائیں، ٹرانسپورٹرز، کاروباری و صنعتی تنظیمیں
24 مئی ، 2025FacebookTwitterWhatsapp
کراچی(اسٹاف رپورٹر) گڈز ٹرانسپورٹرز، کاروباری اور صنعتی تنظیموں کے رہنماؤں نے حکومت سے مطالبہ کیا ہے کہ ملک کی تمام ہائی ویز اور اہم شاہراہیں فوری کھلوائی جائیں، ہیوی وہیکلز کی راہ میں رکاوٹیں ختم کی جائیں ، تمام گڈز ٹرانسپورٹرز اور ان کے عملے کو فول پروف سیکورٹی فراہم کی جائے، گاڑیوں کے نقصانات کا ازالہ کیا جائے، شہیدو زخمی ڈرائیورز اور دیگر عملے کی امداد کی جائے۔ سندھ گڈز ٹرک ٹریلر اونرز ایسوسی ایشن کے اعلامیے کے مطابق صدر ملک شبر خان نے حالیہ پرتشدد واقعات پر ملک کی تمام بڑی کاروباری و صنعتی تنظیموں سے رابطہ کرلیا ہے، جس پر مشترکہ موقف اختیار کرتے ہوئے کہا ہے کہ اگر گڈز ٹرانسپورٹ کا پہیہ رک گیا تو اس کا براہِ راست اثر ملک کی صنعت، برآمدات، کاروبار اور عوام پر پڑے گا،انہوں نے متنبہ کیا کہ اگر حکومت نے فوری ایکشن نہ لیا تو معیشت کو ناقابلِ تلافی نقصان پہنچ سکتا ہے۔
====================
گلشن معمار اور اورنگی میں شوہروں نے فائرنگ کرکے بیویاں قتل کر دیں
کراچی( اسٹاف رپورٹر )گلشن معمار اور اورنگی ٹاؤن میں شوہر وں نے فائرنگ کر کے بیویاں قتل کر دیں ، تفصیلات کے مطابق گلشن معمار تھانے کی حدود ملا عیسیٰ گوٹھ چنا محلہ سے 22 سالہ اقصیٰ اسماعیل زوجہ اسماعیل کی گولی لگی لاش کو نجی اسپتال لایا گیا ،مقتولہ کو سر میں گولی مار کر قتل کیا گیا، پولیس کے مطابق مقتولہ کو اس کے شوہر اسماعیل چنا نے فائرنگ کر کے قتل کیا ہے جسے گرفتار کر لیا گیا ہے تاہم ملزم کا دعویٰ ہے کہ وہ اپنا لائسنس یافتہ پستول صاف کر رہا تھا کہ اتفاقاً گولی چل گئی جو اس کی بیوی کو لگی ،مقتولہ ملزم کی دوسری بیوی تھی اور اس نے چھ ماہ قبل اس سے شادی کی تھی، پہلی بیوی سے پانچ بچے ہیں ،واقعہ کے وقت گھر میں پہلی بیوی اس کے بچے اور ملزم کی والدہ بھی موجود تھے،واقعہ کا مقدمہ مقتولہ کی والدہ کی مدعیت میں درج کر لیا گیا ہے، مقتولہ کی والدہ کے مطابق گذشتہ شام بیٹی نے فون کرکے بتایا کہ اسماعیل اس پر تشدد کرتا ہے،گزشتہ رات بیٹی کے پڑوسیوں نے فون کرکے بتایا کہ اقصیٰ کو اس کے شوہر نے فائرنگ کرکے قتل کردیا ہے،میری بیٹی کے بازو سینے ،کندھے اور ٹانگ پر تشدد کے نشانات موجود تھے،دریں اثنا اورنگی ٹاؤن سیکٹر 10 آفریدی کالونی میں واقع مکان میں فائرنگ کے واقعہ میں 58 سالہ رخسانہ زوجہ گل شیرین زخمی ہو گئی جو عباسی شہید اسپتال میں دوران علاج وہ چل بسی، پولیس کے مطابق مقتولہ کو اس کے شوہر گل شیرین ولد زیارت گل نے جھگڑے کے دوران شک کی بناء پر تیس بور پستول سے فائرنگ کر کے زخمی کیا اور فرار ہو گیا،بعد ازاں مقتولہ اسپتال میں دم توڑ گئی ، مقتولہ کو گردن اور سینے پر تین گولیاں ماری گئی ہیں،مقتولہ 8 بچوں کی ماں تھی جن میں 6 بیٹیاں اور دو بیٹے شامل ہیں، ملزم کا آبائی تعلق مانسہرہ سے ہے۔
