آرمی چیف کو فیلڈ مارشل کے عہدے پر ترقی دینے کا نوٹیفیکیشن جاری
وزارت دفاع کی جانب سے جنرل عاصم منیر کو فیلڈ مارشل مقرر کرنے کا نوٹیفیکیشن جاری کیا گیا
آرمی چیف کو فیلڈ مارشل کے عہدے پر ترقی دینے کا نوٹیفیکیشن جاری
اسلام آباد -) آرمی چیف کو فیلڈ مارشل کے عہدے پر ترقی دینے کا نوٹیفیکیشن جاری کر دیا گیا۔ تفصیلات کے مطابق آرمی چیف جنرل عاصم منیر نے باقاعدہ طور پر فیلڈ مارشل کا عہدہ سنبھال لیا۔ وزارت دفاع کی جانب سے جنرل عاصم منیر کو فیلڈ مارشل مقرر کرنے کا نوٹیفیکیشن جاری کر دیا گیا۔ دوسری جانب آرمی چیف کو فیلڈ مارشل کے عہدے پر ترقی دیے جانے سے متعلق سینیٹر فیصل واوڈا کی جانب سے اہم گفتگو کی گئی ہے۔
نجی ٹی وی چینل سماء نیوز سے گفتگو کرتے ہوئے فیصل واوڈا نے کہا کہ فیلڈ مارشل کی ملازمت میں مدت کوئی کا تعین نہیں ہے ، اگر اس حوالے سے کوئی قانونی رکاٹ بھی ہوئی تو اسے قانون سازی کے ذریعے دور کر لیا جائے گا۔ انہوں نے مزید کہا کہ فیلڈ مارشل ایک روایتی عہدہ نہیں، اب تمام فورسز فیلڈ مارشل کے ماتحت ہوں گی، اب تمام تعیناتیاں، مدت میں توسیع، ترقیوں کا فیصلہ فیلڈ مارشل کریں گے۔
آرمی چیف جو فیلڈ مارشل کے عہدے پر ترقی دینے کے وزیر اعظم کے فیصلے کے حوالے سے فیصل واوڈا نے کہا کہ شہباز شریف اسمارٹ وزیراعظم ہیں اور قابل ایڈمنسٹریٹر ہیں۔ اپنے ایک اور بیان میں سینیٹر فیصل واوڈا نے کہا کہ جس طریقے سے فیلڈ مارشل عاصم منیر نے کردار نبھایا ہے وہ عہدے کے مستحق ہیں۔ فیلڈ مارشل عاصم منیر پاکستان کو بلندی پر لے جائیں گے اس میں شک نہیں ہے۔
بھارت کو جس طرح منہ توڑ جواب دیا گیا ہے دنیا تعریف کررہی ہے، امریکا کے ساتھ تعلقات بہت بہتر ہوگئے ہیں، ٹریڈ بھی اوپر جائے گی۔ سینیٹر فیصل واوڈا نے کہا کہ دہشت گردی کے خلاف جنگ اور معیشت کے لیے فیلڈمارشل عاصم منیر کی خدمات ہیں، کوئی دو رائے نہیں خطے میں طاقت کا توازن بدلنے کا سہرا فیلڈ مارشل عاصم منیر کو ہی جاتا ہے۔ انہوں نے کہا کہ فیلڈ مارشل قابل انسان ہیں وہ عہدے کے مستحق ہیں، پوری قوم عاصم منیر کو مبارکباد پیش کرتی ہے۔
واضح رہے کہ وزیراعظم شہباز شریف کی زیرصدارت وفاقی کابینہ کے اجلاس میں آج اہم فیصلے ہوئے جہاں وفاقی کابینہ نے جنرل سید عاصم منیر (نشان امتیاز ملٹری) کو فیلڈ مارشل کے عہدے پر ترقی دینے کی منظوری دی، حکومت نے ائیر چیف مارشل ظہر احمد بابر سدھو کی مدت ملازمت پوری ہونے پر ان کی خدمات کو بھی جاری رکھنے کا بھی متفقہ فیصلہ کیا، وزیراعظم شہباز شریف نے صدر مملکت آصف علی زرداری سے ملاقات کرکے انہیں اس فیصلے کے حوالے سے اعتماد میں لیا۔
میڈیا رپورٹس کے مطابق معرکہ حق آپریشن بنیان مرصوص کی اعلیٰ حکمتِ عملی اور دلیرانہ قیادت کی بنیاد پر ملک کی سلامتی کو یقینی بنانے اور دشمن کو شِکست فاش دینے پر حکومت پاکستان کی جانب سے جنرل سید عاصم منیر کو فیلڈ مارشل کے عہدے پر ترقی دینے کی منظوری دی گئی، کابینہ اجلاس کے دوران وزیراعظم نے یہ تجویز پیش کی، جس پر جنرل سید عاصم منیر کو فیلڈ مارشل کے عہدے پر ترقی دینے کی شہبازشریف کی تجویز کابینہ نے منظور کرلی۔
آپریشن بنیان مرصوص کے دوران گراں قدر خدمات انجام دینے والوں کو اعلی سرکاری ایورڈز سے نوازانے کا بھی فیصلہ کیا گیا۔ وفاقی کابینہ نے متفقہ فیصلہ کیا کہ افواج پاکستان کے افسران و جوان، غازیان، شہدا اور مختلف شعبوں سے تعلق رکھنے والے پاکستانی شہریوں کو آپریشن بنیان مرصوص کے دوران ان کی گراں قدر خدمات کے اعتراف میں اعلی سرکاری ایورڈز سے نوازا جائے گا
پاکستان کی تاریخ کے شاندار جنگی کردار کیلئے قوم کا خراج تحسین
اسلام آباد : (انصار عباسی)…جنرل سید عاصم منیر کی فیلڈ مارشل کے عہدے پر ترقی ایک فوجی اعزاز سے بڑھ کر ہے۔ یہ ایک ایسے رہنما کیلئے قوم کی جانب سے خراج تحسین ہے جو اس وقت ثابت قدم رہے اور شاندار کارکردگی دکھائی جب پاکستان کو اپنی تاریخ کے ایک انتہائی نازک چیلنج کا سامنا تھا۔
بھارت کے ساتھ حالیہ جنگ کے دوران جنرل عاصم منیر کی فیصلہ کن قیادت نے پاکستان کو بین الاقوامی سطح پر بے مثال وقار اور عزت و احترام ملا۔
کابینہ کے ذرائع کے مطابق، منگل کو ہونے والے اجلاس میں وزیراعظم شہباز شریف نے جنرل عاصم منیر کی ترقی کی باضابطہ سفارش کی۔ اس تجویز کی بنیاد ان کی غیر معمولی قیادت، اسٹریٹجک قابلیت، اور قوم کے دفاع کیلئے غیر متزلزل وابستگی تھی جس کے اعتراف میں کابینہ نے متفقہ طور پر وزیراعظم کی سفارش کی تائید کی۔
7؍ مئی 2025ء کی رات بھارت نے پاکستان کی خودمختاری کو پامال کرنے کیلئے بلا اشتعال اور بلا جواز فوجی حملہ کیا۔ اس تاریک گھڑی میں جنرل عاصم منیر نے بے مثال شجاعت، بہادری، واضح سوچ اور عزم کے ساتھ ملک کے دفاع کی قیادت کی۔
ان کی کمان میں مسلح افواج نے تیز، مربوط اور مستعدی سے جواب دیا، دشمن کے مقاصد کو موثر انداز سے ناکام بنایا اور پاکستان کی علاقائی سالمیت کے دفاع کو یقینی بنایا۔
کابینہ کو بتایا گیا کہ قوم ایک غیر معمولی چیلنجنگ مرحلے سے گزر چکی ہے لیکن جنرل عاصم منیر کی قیادت طاقت اور اتحاد کے ستون کے طور پر کھڑی ہے۔ کابینہ نے اس بات کا اعتراف کیا کہ جنرل سید عاصم منیر نے مثالی جرأت کا مظاہرہ کرتے ہوئے تینوں افواج کو ایک مربوط جنگی حکمت عملی کے تحت متحد رکھا جو ایک تاریخی اور باوقار کامیابی کا باعث بنی۔
بھارت کے ساتھ اس تنازع کے دوران، جنرل عاصم منیر کی کمان نظم و ضبط، ہم آہنگی اور درستگی کی مثال تھی، جس کی وجہ سے ایک ایسی فتح نصیب ہوئی جس نے نہ صرف اس پاک سر زمین کو محفوظ رکھا بلکہ قوم کے حوصلے بھی بلند کیے۔
کابینہ کے ایک ذریعے کے مطابق، یہ پاکستان کی تاریخ کا ایک نادر لمحہ تھا جو اس بات کا متقاضی تھا کہ مسلح افواج کی رہنمائی کرنے والی شخصیت کو ان کی غیر معمولی کارکردگی کیلئے غیر معمولی اعزاز سے نوازا جائے۔
ذرائع نے بتایا کہ فوج کے قوانین فور اسٹار جرنیل کو فیلڈ مارشل کے عہدے پر ترقی دینے کی اجازت دیتے ہیں اور فیلڈ مارشل فوج میں اعلیٰ ترین عہدہ بھی ہے۔
===========================
66سال بعد دوسرا فیلڈ مارشل مل گیا
66سال بعد دوسرا فیلڈ مارشل مل گیا
لاہور (صابر شاہ) پاکستان کے موجودہ آرمی چیف، جنرل سید عاصم منیر، کو منگل کے روز حال ہی میں بھارت کے ساتھ ہونے والی مختصر مگر اہم جنگ کے دوران ان کی قابلِ ستائش خدمات اور قابلِ تعریف قیادت کے اعتراف میں فیلڈ مارشل کے اعلیٰ ترین عہدے پر ترقی دے دی گئی۔ تحقیق سے پتہ چلتا ہے کہ تقریباً 66 سال قبل، 1959 میں، اُس وقت کے آرمی چیف، ایوب خان کو اُس وقت کی صدارتی کابینہ نے فیلڈ مارشل کا عہدہ عطا کیا تھا۔ ایوب خان، جو برطانوی رائل ملٹری اکیڈمی سینڈہرسٹ کے تربیت یافتہ تھے، نے اکتوبر 1958 میں ایک فوجی انقلاب کے ذریعے اقتدار سنبھالا، اور 1965 میں وہ ملک کے صدر منتخب ہوئے۔ تحقیق سے پتہ چلتا ہے کہ یہ پانچ ستارہ عہدہ، جس کا پرانی جرمن زبان میں مطلب بادشاہ کے گھوڑوں کا نگران یا محافظ ہے، 840 سال یا 1185 سے کئی ممالک میں موجود ہے، جب فرانسیسی بادشاہ فلپ آگسٹس نے جنرل البیری کلیمینٹ کو دنیا کا پہلا فیلڈ مارشل مقرر کیا تھا۔ فیلڈ مارشل کلیمنٹ نے شاہ فلپ کے ساتھ تیسری صلیبی جنگ میں حصہ لیا تھا، لیکن وہ 1191 میں وفات پا گئے۔
