ٹک ٹاکر آیت مریم کا قتل: شوہر گرفتار، تفتیش جاری
لاہور: نواب ٹاؤن پولیس نے ٹک ٹاکر آیت مریم کے قتل کے مقدمے میں اس کے شوہر سعد کو گرفتار کر لیا ہے۔ ملزم نے معمولی جھگڑے کے بعد بیوی کا گلا دبا کر اسے قتل کر دیا۔
واقعے کی تفصیلات کے مطابق، آیت مریم کی بہن زینب جب اس سے ملنے گھر پہنچی تو محلے داروں کے ہمراہ اندر داخل ہوئی تو آیت کو بیڈ پر مردہ حالت میں پایا۔ پولیس کو اطلاع ملتے ہی فوری کارروائی کرتے ہوئے 24 گھنٹے کے اندر ملزم کو گرفتار کر لیا گیا۔
ایس پی صدر ڈاکٹر غیور احمد کا کہنا ہے کہ ملزم اور مقتولہ کے درمیان اکثر جھگڑے ہوتے رہتے تھے۔ ابتدائی تفتیش میں ملزم نے معمولی تنازعے کو قتل کی وجہ بتایا ہے، تاہم مزید شواہد اکٹھے کیے جا رہے ہیں۔ ملزم کو تفتیش کے لیے انویسٹی گیشن ٹیم کے حوالے کر دیا گیا ہے۔
گھریلو تشدد کے خلاف ردعمل
یہ واقعہ ایک بار پھر گھریلو تشدد کے بڑھتے ہوئے واقعات کی طرف توجہ دلا رہا ہے۔ گذشتہ ہفتے بھی ڈسکہ کے علاقے تھانہ ستراہ میں دولہے عدنان کو سسرال میں فائرنگ کر کے ہلاک کر دیا گیا تھا، جس کے بعد سے سماجی حلقوں میں گھریلو تشدد کے خلاف سخت قوانین کی مانگ زور پکڑ رہی ہے۔
پولیس کا کہنا ہے کہ آیت مریم کے قتل کی مکمل تفتیش کی جا رہی ہے اور ملزم کو سخت سزا دلانے کے لیے عدالت میں مضبوط کیس پیش کیا جائے گا۔
========================
سندھ ہائیکورٹ نے ایئر پورٹ خودکش بم دھماکے میں دہشتگردوں کی فنڈنگ اور سہولتکاری کے مقدمے ملزم کی ضمانت منظور کرلی۔ ہائیکورٹ نے ایئر پورٹ خودکش بم دھماکے میں دہشتگردوں کی فنڈنگ اور سہولتکاری کے مقدمے میں ملیں ملوث ملزم بلال کی درخواست ضمانت کا مختصر فیصلہ سنادیا۔ عدالت نے ملزم بلال کی درخواست ضمانت منظور کرلی۔ عدالت نے ملزم بلال کو 2 لاکھ روپے کے مچلکے جمع کروانے کا حکم دیدیا۔ پراسیکیوشن کے مطابق ملزمان کیخلاف دہشتگردوں کی فنڈنگ کا مقدمہ سی ٹی ڈی نے درج کیا ہے۔ ملزمان نے خودکش حملے میں استعمال ہونے والی گاڑی کی خریداری کے لئے رقم کی ادائیگی میں سہولتکاری کی تھی۔ ملزم بلال نجی بینک کا ملازم ہے۔ مقدمے میں کالعدم تنظیم کے کمانڈر بشیر زیب اور رحمان گل مفرور ہیں۔
=======================
سندھ ہائیکورٹ نے نئی نہروں کیلئےپانی کی دستیابی کے سرٹیفکیٹ اور ارسا میں سندھ کے نمائندے کی تقرری کیخلاف درخواست وفاقی حکومت کے جواب پر درخواست نمٹادی۔ ہائیکورٹ میں نئی نہروں کیلئےپانی کی دستیابی کے سرٹیفکیٹ اور ارسا میں سندھ کے نمائندے کی تقرری کیخلاف درخواست کی سماعت ہوئی۔ عدالت میں ارسا کے نمائندے، ایڈووکیٹ جنرل سندھ، ایڈیشنل اٹارنی جنرل، درخواستگزار بیرسٹر ضمیر گھمرو پیش ہوئے۔ ایڈیشنل اٹارنی جنرل نے موقف دیا کہ پانی کی دستیابی کا سرٹیفکیٹ بھی منسوخ کر دیا گیا ہے۔ وفاقی حکومت نے سی سی آئی کے اجلاس میں منصوبہ منسوخ کردیا ہے۔ ارسا میں سندھ کا نمائندہ چند دن میں مقرر کر دیا جائے گا۔نہروں کا منصوبہ چاروں صوبوں کی باہمی رضا مندی سے بنے گا۔ تمام معاملات مشترکہ مفادات کی کونسل میں جائیں گے۔ وفاقی حکومت نے نہروں کی تعمیر روکنے کا نوٹیفکیشن پیش کردیا۔ عدالت نے ریمارکس دیئے کہ سندھ سے ارسا کے نمائندے کی تقرری کی رپورٹ 22 مئی تک پیش کی جائے۔ عدالت نے وفاقی حکومت کے جواب پر درخواست نمٹادی۔
