شپنگ کمپنیز اور امپورٹرز ایکسپورٹرز سے گزارش کریں گے کہ وہ ٹرانسپورٹرز پر دباؤ نہ ڈالیں، احتجاج کی وجہ سےپورے پاکستان کا کاروباری نظام بری طرح متاثر ہوا ہے،

کراچی

مور خہ 28اپریل 2025

کراچی 28 اپریل کراچی میں حکومت سندھ اور ٹرانسپورٹرز میں مذاکرات کی کامیابی کے بعد گذز ٹرانسپورٹرز نے احتجاج ختم کر دیا ہے۔ یونائٹڈ گذد ٹرانسپورٹ ایسو سی ایشن اور پاکستان گذر ٹرانسپورٹ ایسو سی ایشن کی نثار حسین جعفری اور غلام یاسین نیازی کی سربراہی میں سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن سے ملاقات کی۔ ملاقات میں وزیر اعلیٰ کے معاون خصوصی قاسم نوید قمر، ڈی آئی جی ٹریفک پیر محمد شاہ بھی شریک تھے۔ ٹرانسپورٹرز کے وفد میں شبر ملک، فضل الاہی، حاجی الیاس ، آل ٹرک ڈمپرز اونرز ایسو سی ایشن کے صدر ھاجی یوسف، جنرل سیکریٹری جان عالم، میاں جان بھی شامل تھے۔ ٹرانسپورٹرز نے وکلاء کے احتجاج کی وجہ سے ٹرانسپورٹرز کو درپیش مشکلات اور دیگر مسائل سے آگاہ کیا۔ سینئر وزیر شرجیل انعام میمن نے ٹرانسپورٹرز کو حکومت سندھ کی جانب سے خدشات کے خاتمے اور مسائل کی حل کی یقین دہانی کروائی۔ وفد سے بات کرتے ہوئے سینئر وزیر شرجیل انعام میمن نے کہا کہ احتجاج کی وجہ سے گاڑیاں پھنس جانے پر ٹرانسپورٹرز کو مشکلات کا سامنا ہے، شپنگ کمپنیز اور امپورٹرز ایکسپورٹرز سے گزارش کریں گے کہ وہ ٹرانسپورٹرز پر دباؤ نہ ڈالیں، احتجاج کی وجہ سےپورے پاکستان کا کاروباری نظام بری طرح متاثر ہوا ہے، حکومت سندھ کو ٹرانسپورٹرز کے ساتھ ساتھ تمام کاروباری حضرات کے پریشانیوں کا احساس ہے۔ بعد ازاں سینئر وزیر شرجیل انعام میمن ٹرانسپورٹرز کے وفد کے ہمراہ ٹرانسپورٹرز کے دھرنے والی جگہ پر مائی کولاچی روڈ پہنچے۔ ٹرانسپورٹرز سے خطاب کرتے ہوئے سینئر وزیر شرجیل انعام میمن نے کہا کہ حکومت سندھ کو ٹرانسپورٹرز کا مکمل احساس ہے، ٹرانسپورٹ برادری پچھلے کچھ عرصہ سے مسائل کا شکار ہے، ٹرانسپورٹرز کو کچھ چیلنجز درپیش ہیں آج بھی میٹنگ ہوئی کچھ اہم فیصلے کئے، جو گاڑیاں مختلف اوقات میں جلی ہیں اس سے متعلق کمیٹی بنادی ہے، کمشنر کراچی اور سیکرٹری ٹرانسپورٹ تحقیقات کریں گے نقصان کا ازالہ کریں گے ۔ انہوں نے کہا کہ دھرنے کی وجہ سے ہزاروں گاڑیاں پھنسی ہیں ، کھانے پینے کا سامان، مویشی اور دیگر سامان پھنسا ہوا ہے، کل وزیر اعلیٰ سندھ نے وزیر اعظم سے بات کی اور سی سی آئی کا اجلاس جلد بلانے کی سفارش کی ، امید ہے خوشخبری آئے گی اور تمام سڑکیں کھل جائیں گی، چاہتے ہیں کہ جلد تمام ٹرانسپورٹ اپنی منازل پر پہنچے، چیف سیکریٹری سندھ شپنگ کمپنیوں کو لکھیں گے تاکہ ٹرانسپورٹرز پر اضافی کرایہ یا جرمانہ نہ ہو۔ شرجیل انعام میمن نے کہا کہ پاکستان کو بہت چیلنجز درپیش ہیں ، روڈ بلاک کرنے سے اس وقت لوگوں کو بہت سی مشکلات پیش آرہی ہیں، ہر پاکستانی اپنی ذمہ داری کو بخوبی سمجھے، ہمیں اتحاد و اتفاق کا مظاہرہ کرنا ہے، میری احتجاج کرنے والوں سے گزارش ہے کہ جلد اپنے اس احتجاج کو ختم کریں تاکہ لوگوں کی پریشانی ختم ہو، حکومت پہلے بھی آپ کے ساتھ کھڑی تھی اب موجود ہے آگے بھی رہے گی۔ سینئر وزیر شرجیل انعام میمن کی یقین دہانی پر گڈز ٹرانسپورٹرز نے اپنا احتجاج ختم کر دیا۔