لاڑکانہ ( رپورٹ عاشق پٹھان سے): شہید محترمہ بینظیر بھٹو میڈیکل یونیورسٹی لاڑکانہ کی جانب سے حالیہ جعفر ایکسپریس سانحہ کے خلاف ایک احتجاجی ریلی کا انعقاد کیا گیا۔ یہ ریلی چانڈکا میڈیکل کالج لاڑکانہ کے ایڈمنسٹریشن بلاک سے شروع ہوکر کالج کے مرکزی دروازے پر اختتام پذیر ہوئی۔ ریلی کے بعد جعفر ایکسپریس کے المناک حادثے میں جاں بحق ہونے والے افراد کی یاد میں ایک تعزیتی تقریب بھی منعقد کی گئی۔
تفصیلات کے مطابق، یہ ریلی چانڈکا میڈیکل کالج لاڑکانہ کے پرنسپل پروفیسر ضمیر احمد سومرو اور رجسٹرار پروفیسر فہد جبران سیال کی قیادت میں نکالی گئی، جس کا مقصد حالیہ جعفر ایکسپریس سانحہ، بربریت پر مبنی دہشت گردی اور بے گناہ شہریوں کے قتل عام کے خلاف احتجاج کرنا تھا۔
اختتامی تقریب میں مقررین نے اس المناک واقعے اور دہشت گردی کے فعل کی شدید مذمت کی۔ انہوں نے پاک فوج کی بروقت کارروائی کو سراہا اور فوج کے حق میں نعرے بھی لگائے۔ مقررین نے زور دے کر کہا کہ وہ ملک میں
ہونے والی ہر قسم کی دہشت گردی اور بے گناہ شہریوں کے قتل عام کی مذمت کرتے ہیں۔
ریلی میں طلبہ نے دہشت گردی کے خلاف اور پاک فوج کے حق میں نعرے درج پلے کارڈز اٹھا رکھے تھے۔ اس ریلی میں بڑی تعداد میں فیکلٹی ممبران، افسران اور طلبہ نے شرکت کی، جن میں ڈین پروفیسر محمد حنیف شیخ، چانڈکا میڈیکل کالج کی وائس پرنسپل ڈاکٹر فوزیہ چانڈیو، ایڈمن آفیسر وحید زمان، اور سیکیورٹی انچارج سلطان احمد بھٹو شامل تھے۔
