جیکب آبادجمعیت علماء اسلام کے مرکزی سیکریٹری جنرل اور رکن قومی اسمبلی مولانا عبدالغفور حیدری نے کہا ہے کہ پاکستان میں کبھی آر ٹی ایس تو کبھی فارم 47کا سہارا لیکر کٹھ پتلی حکومتیں بنائی جاتی ہیں، موجودہ حکمران نمائشی ہیں، پارلیمنٹ کی بالادستی اور آئین کی حکمرانی کی جنگ جے یو آئی لڑ رہی ہے، اپوزیشن جماعتوں کی اے پی سی میں شرکت کریں گے۔ان خیالات کا اظہار انہوں نے جیکب آباد میں جے یو آئی سندھ کے ترجمان ڈاکٹر اے جی انصاری سے ملاقات کے دوران گفتگو کرتے ہوئے کیا۔ مولانا حیدری کا کہنا تھا کہ اپوزیشن جماعتوں کی 26فروری کو ہونے والی اے پی سی میں شرکت کریں گے، فی الحال اے پی سی کا ایجنڈا سامنے نہیں آیا دیکھیں گے کہ کیا ڈرافٹ تیار ہوتا ہے میثاق جمہوریت کے حوالے سے کیا باتیں ہوتی ہیں جو باتیں سامنے آئیں گی وہ ہم پارٹی کی مجلس شوریٰ کے سامنے رکھیں گے۔ جے یو آئی رہنما نے مزید کہا کہ موجودہ حکمران نمائشی ہیں فیصلے کہی اور سے ہورہے ہیں جب تک صاف شفاف انتخابات نہیں ہوتے اور پارلیمنٹ کو آزاد نہیں کیا جاتا تب تک ملک کے مسائل حل نہیں ہونگے، ملک میں ہونے والے انتخابات میں بدترین دھاندلی کی جاتی ہے کبھی آر ٹی ایس تو کبھی فارم 47کا سہارا لیکر کٹھ پتلی حکومتیں بنائی جاتی ہیں، انہوں نے کہا کہ 2024ء کے دھاندلی زدہ انتخابات کو روز اول سے نہیں مانتے دھاندلی کے خلاف سب سے زیادہ آواز جے یو آئی نے اٹھائی ہے، ان کا کہنا تھا کہ پارلیمنٹ کی بالادستی اور آئین کی حکمرانی کی جنگ اس وقت جے یو آئی تنہالڑ رہی ہے جے یو آئی سربراہ مولانا فضل الرحمن پارلیمنٹ کے اندر اور باہر قانون کی حکمرانی کے لیے جدوجہد کررہے ہیں۔
جیکب آباد دریائے سندھ سے کینال نکالنے کے خلاف علی محمد عوامی پارٹی کی جانب سے احتجاجی مظاہرہ اور بھوک ہڑتال۔ تفصیلات کے مطابق جیکب آباد میں علی محمد عوامی پارٹی کی جانب سے دریائے سندھ سے کینال نکالنے کے خلاف ایک احتجاجی جلوس چیئرمین دلمراد لاشاری کی قیادت میں نکالا گیا، مظاہرین نے جلوس نکال کر شہر میں مارچ کیا اور کینالوں کے خلاف نعریبازی کی، مظاہرین نے پریس کلب کے سامنے پہنچ کر دھرنا دیا جس کے باعث روڈ بلاک ہوگیا، اس موقع پر مظاہرین نے پریس کلب کے سامنے علامتی بھوک ہڑتال کی، اس موقع پر رہنماؤں نے کہا کہ پنجاب کی زمینوں کو آباد کرنے کے لیے سندھ کو بنجر بنانے کی سازش کی جارہی ہے ایسی کسی سازش کو کامیاب ہونے نہیں دیں گے، انہوں نے کہا کہ سندھ کے خلاف ہونے والی ہر سازشوں کا ڈٹ کر مقابلہ کریں گے، انہوں نے مطالبہ کیا کہ فلفور کینالوں کا فیصلہ واپس لیا جائے بصورت دیگر سندھ کے عوام بھرپور احتجاج کریں گے جس سے فیڈریشن کو نقصان ہوگا۔
جیکب آباد میں رمضان المبارک سے قبل منافع خورتاجروں نے کھجور کی قیمتوں میں اضافہ کردیا، مقامی انتظامیہ نے کوئی نوٹس نہیں لیا۔ تفصیلات کے مطابق جیکب آباد میں رمضان المبارک سے قبل ہی منافع خور تاجروں نے کھجور کی قیمتوں میں اضافہ کردیا ہے، رمضان المبارک کی آمد سے قبل کھجور سمیت دیگر اشیاء خورد و نوش کی قیمتوں میں بھی اضافہ کردیا گیاہے منافع خور تاجروں کی جانب سے قیمتوں میں اضافہ کے باوجود مقامی انتظامیہ نے کوئی نوٹس نہیں لیا، جیکب آباد میں جس ایرانی کھجور کی قیمت 500 روپے کلو تھی اب اضافہ کرکے 800 روپے کلو کردی گئی ہے جبکہ بلوچستان کے علاقے پنجگور کی کھجور 800 سے بڑھا کر 1200سے 1400 روپے کلو فروخت کی جانے لگی ہے جبکہ سندھ کے علاقے خیر پور کی مختلف اقسام کی کھجوروں کی قیمتوں میں بھی 100 سے 300 روپے فی کلو اضافہ کردیا گیا ہے، شہریوں کا کہنا ہے کہ رمضان المبارک سے قبل ہی کھجور سمیت دیگر اشیاء خوردنوش کی قیمتوں میں ہوشربا اضافہ کردیاگیا ہے امکان ہے کہ رمضان المبارک میں قیمتوں میں مزید اضافہ کیا جائے گا مقامی انتظامیہ قیمتوں میں اضافے پر خاموش تماشائی بنی ہوئی ہے، شہریوں نے مطالبہ کیا کہ رمضان المبارک میں اشیاء خوردونوش کی قیمتوں میں اضافے کا نوٹس لیکر منافع خور تاجروں کے خلاف کاروائی کرکے عوام کوریلیف فراہم کیا جائے۔
جیکب آباد کے صحافی عبدالرزاق کھرل کی نویں برسی کی تقریب منائی گئی، سیاسی، سماجی، مذہبی، بیوپاری تنظیموں کے رہنماؤں سمیت صحافیوں کی شرکت، مرحوم صحافی کی صحافتی خدمات پر خراج تحسین پیش کیاگیا۔ تفصیلات کے مطابق جیکب آباد کے مرحوم صحافی عبدالرزاق کھرل کی نویں برسی کی تقریب پریس کلب جیکب آباد میں منائی گئی، تقریب میں پیر آف شاہ پور سید منصور علی شاہ، سندھ دوست کمیٹی کے انتظار چھلگری، جے یو آئی کے ڈاکٹر اے جی انصاری، تعلیمی ماہر محمد عالم کھوسو، ایڈوکیٹ عبدالجبار لاشاری، سماجی رہنما عبدالحئی سومرو، انجمن تاجران کے احمد علی بروہی، پریس کلب کے صدر محمد نواز سولنگی، عبدالرحمن آفریدی،عبدالغنی کھوسو، اظہر گل سرکی، بابو غلام حیدر مگسی، مکیش کمار روپیتا، زاہد علی کھرل، اسد مغل، برکت علی کھوکھر، میر حسن گولو سمیت بڑی تعدادمیں شہریوں نے شرکت کی، اس موقع پر مقررین نے خطاب کرتے ہوئے کہا کہ صحافی عبدالرزاق کھرل نے ہمیشہ مظلوموں کا ساتھ دیا انہوں نے اپنی قلم سے مظلوم عوام کا آواز ایوانوں تک پہنچایا، انہوں نے کہا کہ عبدالرزاق کھرل کا نام جیکب آباد کی صحافت میں ہمیشہ یاد رکھا جائے گا اور ان کی خدمات کو کبھی فراموش نہیں کیا جاسکتا، مقررین نے کہا کہ صحافی عبدالرزاق کھرل نے بغیر کسی لالچ، مذہب رنگ و نسل کے عوام کی خدمت کی ہے، انہوں نے کہا کہ مرحوم عبدالرزاق کھرل کے مشن پر ان کے بھائی زاہد علی کھرل گامزن ہیں جو ہمیشہ مظلوموں کے ساتھ کھڑے نظر آتے ہیں، اس موقع پر عبدالرزاق کھرل یادگار کمیٹی کی جانب سے سیاسی، سماجی، مذہبی تنظیموں کے رہنماؤں کی ان کی خدمات پر تعریفی سرٹیفکیٹ دئیے گئے۔
