فاطمہ جناح میڈیکل یونیورسٹی میں مینٹورشپ پروگرام کا آغاز

فاطمہ جناح میڈیکل یونیورسٹی میں مینٹورشپ پروگرام کا آغاز
فاطمہ جناح میڈیکل یونیورسٹی (ایف جے ایم یو) میں ہائر ایجوکیشن کمیشن (ایچ ای سی) کے تعاون سے شعبہ کمیونٹی میڈیسن کے زیر اہتمام ویمن ایمپاورمنٹ منٹورشپ پروگرام (Women Empowerment Mentorship Program) کا آغاز ہو چکا ہے، جس کا بنیادی مقصد خواتین کو ذاتی اور پیشہ ورانہ طور پر بااختیار بنانا اور اعلیٰ تعلیم کے میدان میں ترقی کی جانب گامزن کرنا ہے۔
سیشن کی صدارت وائس چانسلر فاطمہ جناح میڈیکل یونیورسٹی پروفیسر ڈاکٹر خالد مسعود گوندل نے کی۔
استقبالیہ خطاب میں پروفیسر ڈاکٹر خالد مسعود گوندل نے تعلیم اور تحقیق میں خواتین کو بااختیار بنانے اور ان کی رہنمائی کو فروغ دینے میں مینٹورشپ پروگرام کی اہمیت پر زور دیا۔ انہوں نے پاکستان میں اعلی تعلیم کو اپ گریڈ کرنے میں نیشنل اکیڈمی آف ہائر ایجوکیشن ، ہائر ایجوکیشن کمیشن پاکستان کے کلیدی کردار کی بھی تعریف کی۔
اجلاس میں ڈینز، مینٹورشپ پروگرام کمیٹی کے ممبران اور فاطمہ جناح میڈیکل یونیورسٹی میں ویمن ایمپاورمنٹ اور مینٹور شپ سیشن میں داخلہ لینے والے مینٹیز (Mentees) جن میں پروفیسر ڈاکٹر بلقیس شبیر ، پروفیسر ڈاکٹر عالیہ زاہد، پروفیسر ڈاکٹر شمیلا اجاز منیر ، پروفیسر ڈاکٹر لبنا امیر ، پروفیسر ڈاکٹر فرزانہ ، پروفیسر ڈاکٹر نغمانہ لطیف ، پروفیسر ڈاکٹر عائشہ راشد ، پروفیسر ڈاکٹر فوزیہ اسحاق ، پروفیسر ڈاکٹر اسماء قریشی ، پروفیسر ڈاکٹر نور الائین وحید ، ڈاکٹر رمیز کلیم ، ڈاکٹر تسکین ظہرہ ، ڈاکٹر فائزہ ابرار سمیت دیگر فیکلٹی ممبران نے شرکت کی۔
ویمن ایمپاورمنٹ مینٹورشپ پروگرام کو تعلیم وتحقیق میں خواتین کو بااختیار بنانے کے لیے ماڈل ڈیزائن کیا گیا ہے جس میں پانچ جامع ماڈیول شامل ہیں۔
پروفیسر ڈاکٹر بلقیس شبیر نے “اعلی تعلیم میں رہنمائی” پر توجہ مرکوز کرتے ہوئے ویمن ایمپاورمنٹ مینٹور شپ پروگرام ماڈیول 1 پر سرپرستی فراہم کی ۔ انہوں نے شرکاء کو اعلی تعلیم میں سرپرستی کی اہمیت اور کیریئر کی ترقی پرسیر حاصل گفتگو کی۔ ڈاکٹر تسکین زہرہ نے بطور فوکل پرسن ویمن ایمپاورمنٹ اور مینٹور شپ پروگرام کے حوالہ سے تفصیلی بریفنگ دی۔
ویمن ایمپاورمنٹ مینٹور شپ پروگرام کے ماڈیولز پر شرکاء کو اچھی رہنمائی فراہم کی گئی، جو کہ تعلیمی اور تحقیق میں ان کی مستقبل کی ترقی کے لیے کار آمد ثابت ہو گی۔

=========================

سروسز ہسپتال کے سینئر کلرک مقصود الٰہی کی ریٹائرمنٹ پر الوداعی پارٹی کے موقع پر صوبائی صدر پنجاب پیرا میڈیکل سٹاف ایسوسی ایشن محمد ارشد بٹ، اے ایم ایس ڈاکٹر قذافی ،اختر یعقوب، اصغر بدرو دیگر کا گروپ فوٹو