لاہور پریس کلب کے زیر اہتمام شام چوراسی گھرانے سے تعلق رکھنے والے معروف کلاسیکل گلوکار،کمپوزر،میوزک کنسلٹنٹ ،سابق سٹیشن ڈائریکٹر ریڈیو پاکستان سکردو،استاد تصدق علی خان کی یاد میں خصوصی محفل کا اہتمام کیا گیا۔نثارعثمانی ہال میں ہونے والی تقریب کی صدارت پرائیڈ آف پرفارمنس اداکار ،صداکار راشد محمود نے کی جبکہ مہمانا ن خصوصی صدر لاہور پریس کلب ارشد انصاری ،گلوکار انوررفیع ، سینئر شوبز صحافی سید ساجد یزدانی ، کلچرل جرنلسٹس ایسوسی ایشن کے صدر طاہربخاری ،ایڈیٹر روزنامہ حریف تازہ اخبار و او ایس آر ہیڈ پبلک نیوز حفیظ الرحمن مغل اور سید فاطر ولید تھے۔تقریب کی نظامت خواجہ آفتاب حسن نے کی۔انہوں نے استاد تصدق علی خان کی زندگی اور کیرئیر کے حوالے سے ایک مضمون بھی پڑھا۔ تلاوت صباالرحمن جامی نے کی جبکہ معروف نعت خواں سید علی رضا کاظمی نے ہدیہ نعت پیش کیا۔ استاد تصدق علی خان کے صاحبزادے سعادت علی خان نے عارفانہ کلام اورکلاسیکل گائیکی پیش کی۔ سونیکا ، شمون جمی ، رحیم علی خان، شان اختر علی خان ، اعجاز ساغر، نورافشاں، غلام عباس فراست ، ملک ندیم ریاض ،بانسری نواز حنیف خان، کلارنٹ پلیئر جعفرحسین اور نوجوان کلاسیکل گائیک افواض نے شاندار پر فارم کیا۔ تقریب سے خطاب کرتے ہوئے صدر لاہور پریس کلب ارشد انصاری نے کہا کہ میں جب انڈیا گیا تو وہاں بھی شام چوراسی گھرانے کابے حداحترام دیکھا
،کلاسیکل گائیکی کے حوالے سے شام چوراسی گھرانہ کسی تعارف کامحتاج نہیں،استاد تصدق علی خان جیسے فنکار پاکستان کاورثہ ہیں ،میں مبارکباد پیش کرتا ہوں ان کے صاحبزادوں سعادت علی اورثروت علی خان کوجو نہ صرف اپنے والد کے کام کو بلکہ اپنے خاندان شام چوراسی گھرانے کی موسیقی کے میدان میں شاندار روایات کو لے کرآگے بڑھا رہے ہیں، نوجوان رحیم علی خان کو سنا تومحسوس ہوا کہ پاکستان میں کلاسیکل گائیکی کامستقبل روشن ہے۔صاحب صدارت پرائیڈ آف پرفارمنس اداکار ،صداکار راشد محمود نے اپنے خطاب میں کہا کہ استاد تصدق علی خان میرے دوست تھے ،ریڈیو پاکستان میں ہم نے بہت وقت اکٹھے گزارا۔ایسے فنکاروں کی صحبت سے ہی موسیقی کے بارے میں میرے علم میں اضافہ ہوا۔استاد تصدق نے شام چوراسی گھرانے کی روایات کو زندہ رکھا۔انہوں نے فلم کے لیے بھی کام کیا،فلموں کے لیے تیار کی گئی ان کی دھنو ں میں بھی کلاسیکل ٹچ نظرآتاہے۔راشد محمود نے کہا کہ میں لاہورپریس کلب کو خراج تحسین پیش کرتا ہوں کہ ایک ایسے شخص کی یاد میں شام منائی جس
کاساری زندگی کا اوڑھنا بچھونا میوزک رہا۔شام چوراسی وہ گھرانہ ہے جس نے دنیا بھر میں موسیقی کوپہچان دی۔تصدق ایک بڑا تخلیق کارتھا ،اس نے ایسی ایسی دھنیں کمپوز کیں جو ناقابل فراموش ہیں۔سینئر شوبز صحافی سید ساجد یزدانی نے اظہارخیال کرتے ہوئے کہا کہ دنیا بھر میں کلاسیکل میوزک پسند کرنے والے استاد تصدق علی خان کے نام اورکام سے بخوبی واقف ہیں۔ریڈیو پاکستان میں ان سے بارہا ملاقاتیں رہیں ،وہ انتہائی نفیس انسان تھے۔ میں حکومت پاکستان سے اپیل کرتا ہوں کہ استاد تصدق علی خان کو بعداز مرگ سرکاری اعزازسے نواز ا جائے کیوں کہ وہ اس کے حقدار ہیں۔تصدق علی خان سے بے شمار سنگرز نے سیکھا ، ان کے نام سے ایک میوزک اکیڈیمی ہونی چاہیے۔تقریب سے گلوکار انوررفیع اورپروگرام منیجر ریڈیو پاکستان لاہورمرکز محمدسلیم بزمی نے بھی خطاب کیا اوراستاد تصدق کاشہرہ آفاق گیت بھی پیش کیے۔ کلچرل جرنلسٹس ایسوسی ایشن کے صدر طاہربخاری ،سینئرصحافی سید فاطرولید اورمیوزکالوجسٹ استاد پرویز پارس نے بھی اظہا خیا ل کیا۔ تقریب میں سینئر نائب صدر لاہورپریس کلب افضال طالب ، جوائنٹ سیکرٹری عمران شیخ ،سینئر صحافی علامہ صدیق اظہر، گٹارسٹ سجاد طافو، خاور بیگ ،حامد نواز، ندیم شیخ ،شاہد بخاری ، رفیق خان، ناصرمحمود ،قمرالزمان بھٹی، شبیرصادق،لبنیٰ خان، طاہرچودھری، علی زیب ، اسد اقبال، شہزاد فراموش ، محسن اکرم اورمنیرشرقپوری سمیت استاد تصدق علی خان کے فیملی ممبران ودیگر نے بھرپور شرکت کی۔
