جامعہ کراچی: پروفیسر ڈاکٹر عبدالوحید کی کتاب بعنوان: ”کوانٹی ٹیٹوریسرچ میتھڈز“‘ کا دوسرا ایڈیشن شائع
ڈاکٹر عبدالوحید کوانٹی ٹیٹو ڈیٹا انالیسز میں مہارت رکھنے والے ماہر معاشیات ہیں جو جنوبی ایشیا کی معیشتوں پر عبور رکھتے ہیں
جامعہ کراچی کے شعبہ معاشیات کے پروفیسر ڈاکٹر عبدالوحید کی کتاب بعنوان: ”کوانٹی ٹیٹوریسرچ میتھڈز“ کے دوسرے ایڈیشن کی اشاعت کی تقریب رونمائی پیر کے روزاپلائیڈ اکنامکس ریسرچ سینٹر کی سماعت گاہ میں منعقدہوئی۔مذکورہ کتاب آٹھ ابواب اورتحقیق کے نمایاں تدریسی عنوانوں پرمشتمل ہے۔
اس موقع پر معروف ماہر معاشیات ڈاکٹر قیصربنگالی،شہید بینظیر بھٹو یونیورسٹی شہید بینظیر آباد کے سابق وائس چانسلر ڈاکٹر امانت علی جلبانی ودیگر نے ڈاکٹر عبدالوحید کی تصنیف پر اپنے تاثرات کا اظہارکرتے ہوئے کہا کہ ان کی یہ تصنیف ایم فل،پی ایچ ڈی اسکالرز اور ریسرچرز کے لئے ایک بہترین تحفہ ہے اب یہ ان پر منحصر ہے وہ اس سے کتنا استفادہ کرتے ہیں۔
کتاب کے مصنف پروفیسرڈاکٹر عبدالوحید نے کہا کہ اس تصنیف کا ہر باب قارئین کے لئے ایک نتیجہ خیز راستہ پیش کرتاہے اور ہر باب کا خلاصہ نقات پر مشتمل ہے جس سے قارئین کو پڑھنے میں تحقیق کے مخصوص اصطلاحات کا با آسانی اندازہ ہوجاتاہے۔انہوں نے کتاب میں تحقیق کی تھیوری پرتفصیلی روشنی ڈالی۔انہوں نے بتایا کہ اس تصنیف میں تحقیقی پروپوزل،ریسرچ پیپرکنٹینٹ،لٹریچرریویو،ریسرچ پبلیکشن،ریسرچ پروجیکٹ پروپوزل اور ریسرچ تکنیک اور اینالیسز کو تفصیل سے بیان کیا گیا ہے۔
واضح رہے کہ ڈاکٹر عبدالوحید کوانٹیٹیٹیو ڈیٹا انالیسز میں مہارت رکھنے والے ماہر معاشیات ہیں جو جنوبی ایشیا کی معیشتوں پر عبور رکھتے ہیں۔ انھوں نے اپنا ڈاکٹریٹ گریجویٹ اسکول آف انٹرنیشنل ڈیویلپمنٹ نگویا یونیورسٹی جاپان سے جاپانی حکومت کی فیلوشپ کے ذریعے 2005 میں کیا۔
ڈاکٹر عبدالوحیدنے اپنا پوسٹ ڈاکٹریٹ بھی جاپان سے کیا۔ان کی45 ریسرچ پبلیکیشنز، ایک مونوگراف اورتین کتابیں شائع ہوچکی ہیں۔انھوں نے جاپان، ترکی،یواے ای،کوریا،دبئی اور بحرین میں منعقدہ بین الاقوامی کانفرنسوں میں اپنے متعدد ریسرچ پیپرز پیش کئے ہیں، ان کے کافی ریسرچ مقالے امپیکٹ فیکٹر جرنلز میں شائع ہوچکے ہیں، ڈاکٹر عبدالوحید پاکستان اور گلف اکنامسٹ اور دی نیوز انٹرنیشنل کے لئے بھی لکھتے رہے ہیں۔
ڈاکٹر عبدالوحید کئی پروجیکٹ میں ریسرچ کنسلٹنٹ رہ چکے ہیں۔ انھوں نے05 طلبہ کو پی ایچ ڈی اور 11طلبہ کو ایم فل میں سپروائز کیا ہے۔انھوں نے گریجویٹ اور پوسٹ گریجویٹ لیول پر جامعہ کراچی، ریکیویونیورسٹی جاپان اورنگویا یونیورسٹی جاپان، یونیورسٹی آف بحرین، آئی بی اے کراچی، بحریہ یونیورسٹی اور اقرا یونیورسٹی میں تدریسی فرائض سرانجام دئیے ہیں۔ آج کل وہ شعبہ معاشیات میں صدرشعبہ اور پروفیسر کے فرائض سرانجام دے رہے ہیں اور ان کے پاس رجسٹراراور ڈائریکٹوریٹ آف ڈسٹنس ایجوکیشن کا اضافی چارج بھی ہے۔
