24 جنوری 2025
راولپنڈی
پاکستان مسلم لیگ ن کے سابق کونسلر اظہر علی قادری،جماعت اسلامی شباب ملی کے سابق صدر مجید عباسی ،تاجر رہنما حاجی مسعود اور تحریک انصاف سے مقامی تاجر عبد القدیر خان نے اپنے درجنوں ساتھیوں سمیت عوام پاکستان پارٹی میں شمولیت کا اعلان کردیا اور کہا کہ ہم پارٹی کی مرکزی قیادت شاہد خاقان عباسی ، چوہدری انعام ظفر کی قیادت پر مکمل اعتماد کا اظہار کرتے ہیں۔
عوام پاکستان پارٹی کے پبلک سیکریٹریٹ مری روڈ راولپنڈی میں مرکزی رہنما چوہدری انعام ظفر کی سربراہی میں ایک اہم تنظیمی اجلاس منعقد ہوا۔ جہاں پر پاکستان مسلم لیگ ن کے سابق رہنما و یونین کونسل 30 سے تین مرتبہ کونسلر منتخب ہونے والے اظہر علی قادری،جماعت اسلامی شباب ملی کے سابق صدر مجید عباسی ، تاجر رہنما حاجی مسعود اور تحریک انصاف کے مقامی تاجر عبد القدیر خان نے اپنے درجنوں ساتھیوں سمیت سابقہ پارٹیوں کو خیر آباد کردیا اور اعلان کیا کہ آج کے بعد ہماری وفاداری عوام پاکستان پارٹی کے ساتھ ہے۔ہم مرکزی رہنماؤں شاہد خاقان عباسی ، چوہدری انعام ظفر ،نزیر احمد کشمیری کی قیادت پر مکمل اعتماد کا اظہار کرتے ہیں اور پارٹی میں شمولیت کا اعلان کرتے ہیں۔اس موقع پر پارٹی کے مرکزی رہنما چوہدری انعام ظفر نے ممبران کی شمولیت پر ان کا شکریہ ادا کیا اور کہا کہ عوام پاکستان پارٹی اپنے منشور کے مطابق اپنے ہر ساتھی کو ہمیشہ یاد رکھے گی۔عوام پاکستان پارٹی صرف ایک نعرہ پر بننے والی جماعت نہیں، بلکہ عملی اقدامات پر یقین رکھنے والی جماعت ہے۔ان کا مزید کہنا تھا کہ شاہد خاقان عباسی،مفتاح اسماعیل ایک ایسا نظام لائے ہیں کہ ہر دو سال بعد پارٹی میں انتخابات ہوں گے ،اگر کوئی شاہد خاقان عباسی کی سیٹ پر بھی کاغذات جمع کروانے کا خواہشمند ہوا تو ہم حاضر ہیں ۔عوام کی فلاح کے لئے چل نکلے ہیں۔غربت کا یہ حال ہے کہ بل جمع کروائیں تو گھر میں کھانے کے لئے کچھ باقی نہیں بچتا۔تجاوزات،ریٹ لسٹوں کے نام پر جس طرح تاجروں کو تنگ کیاجاتا ہے وہ سراسر ناانصافی ہے۔ہماری پارٹی تعلیم و صحت پر بھرپور توجہ دے گی۔باہمی اتفاق سے عوام کے مسائل حل کریں گے۔ان کا مزید کہنا تھا کہ پاک فوج کے شانہ بشانہ کھڑے ہیں ۔پاکستان کی ترقی پاک فوج کے بنا ممکن نہیں۔پاک افواج کے بے مثال قربانیوں پر انھیں خراج تحسین پیش کرتے ہیں۔راولپنڈی سٹی کے آرگنائزر نزیر احمد کشمیری نے کہا کہ شاہد خاقان عباسی کا وزن ہے کہ سوچ کو بدلنا ہے۔نوجوان ہمارا سرمایہ ہیں۔انھین با اختیار بنانا ہے۔عوام پاکستان پارٹی کے پلیٹ فارم سے انصاف کو عام کیا جائے گا۔چوہدری انعام ظفر کا مشکور ہوں جنھوں نے پارٹی دفتر بنایا۔تقریب کے اختتام پر ملک وقوم ،پاک افواج اور پارٹی کے استحکام کے لیے دعا کی گئی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
