24 جنوری 2024
دوسری ڈی جی پاکستان ائیرپورٹس اتھارٹی ای-کچہری کا انعقاد
ملکی ہوائی اڈوں کی توسیع اور اپ گریڈیشن جاری ہے, ڈی جی پی اے اے
پاکستان ایئرپورٹس اتھارٹی (PAA) کراچی کے جناح انٹرنیشنل ایئرپورٹ (JIAP) کے دوسرے رن وے کی دوبارہ تعمیر جاری ہے۔ یہ منصوبہ پاکستان کے مصروف ترین ہوائی اڈے پر آپریشنل کارکردگی اور حفاظت کو بہتر بنانے کے لیے اہم کردار ادا کرے گا۔
اسی دوران، سکھر، سکردو، اور ڈیرہ غازی خان ایئرپورٹس پر بڑے طیاروں کی پروازوں کو ممکن بنانے کے لیے توسیعی اور اپ گریڈیشن منصوبے جاری ہیں۔ اس کے علاوہ، ڈیرہ اسماعیل خان کے لیے ایک نیا گرین فیلڈ ایئرپورٹ منصوبہ بندی کے مرحلے میں ہے، جو پاکستان کے ہوابازی کے بنیادی ڈھانچے کو مزید بہتر بنانے کی طرف ایک اہم قدم ہے۔
یہ اعلانات دوسری ای-کچہری کے دوران کیے گئے، جس کی صدارت قائم مقام ڈائریکٹر جنرل (پی اے اے) ایئر وائس مارشل ذیشان سعید نے کی۔ ای-کچہری میں ان کی معاونت کے لئے ڈپٹی ڈی جی ائیرپورٹس صادق الرحمان اور دیگر اہم ڈائریکٹرز بھی موجود تھے۔ اجلاس میں مسافروں کے مسائل اور آپریشنل چیلنجز پر تبادلہ خیال کیا گیا اور (پی اے اے) نے ہوائی اڈوں کی سروسز اور بنیادی ڈھانچے کو بہتر بنانے کے عزم کا اعادہ کیا۔
اجلاس میں اسلام آباد ایئرپورٹ پر قطاروں کے انتظامی نظام کی بہتری، ملتان ایئرپورٹ پر پارکنگ کی سہولت کو بہتر بنانے، اور حیدرآباد اور پاراچنار ایئرپورٹس کے لئے فلائٹ آپریشنز سمیت دیگر معاملات سے متعلق سوال جواب ہوئے۔ ڈی جی (پی اے اے) نے فوری حل کے لیے مخصوص ہدایات جاری کیں اور کہا کہ PAA ہوائی اڈوں کے انتظامات کو محفوظ، موثر، اور مسافر دوست بنانے کے لیے پرعزم ہے۔
ڈائریکٹر جنرل نے مسافروں کی قیمتی آراء کا شکریہ ادا کرتے ہوئے کہا کہ ان کی تجاویز ہوائی اڈوں کی کارکردگی اور خدمات میں مسلسل بہتری کے لیے اہم ہیں۔
ترجمان
