کراچی
مور خہ22 جنوری 2024
سائبر نائف شعبہ میں کینسر کا 100 فیصد علاج ہورہا ہے، سمیتا افضال سید کا سائبر نائف شعبہ کی کارکردگی پر اظہار اطمینان
کراچی22 جنوری۔ ترجمان سندھ حکومت سمیتا افضال سید اور گھنور اسران نے کہا ہے کہ سائبر نائف دماغی کینسر کے علاوہ پروسٹیٹ کینسر کا 100 فیصد علاج فراہم کرتا ہے اور اسپتال میں 570 نئے ڈاکٹرز کی بھرتیوں اور سات منزلہ میڈیکل ٹاور کی تعمیر منصوبے کا حصہ ہے ۔ ان خیالات کا اظہار انہوں نے بدھ کے روز جناح اسپتال کے سائبر نائف ڈیپارنمنٹ میں دورہ کے دوران کیا۔ اس موقع پر سائبر نائف ڈیپارٹمنٹ کے سربراہ پروفیسر ڈاکٹر طارق محمود بھی موجود تھے ۔ سندھ حکومت کی ترجمان اور پیپلزپارٹی کی رکن صوبائی اسمبلی سمیتا افضال سید نے جناح اسپتال کے سائبر نائف سینٹر کا دورہ کیا۔ سائبر نائف ڈیپارٹمنٹ کے پروفیسر ڈاکٹر طارق محمود نے سائبر نائف ڈیپارٹمنٹ کی کارکردگی پر تفصیلی بریفنگ دی۔ سمیتا افضال سید نے مریضوں اور تیمارداروں سے ملاقات کے دوران سائبر نائف شعبہ کی کارکردگی پر اطمینان کا اظہار کیا۔ انھوں نے کہا کہ یہاں جدید ٹیکنالوجی کے ذریعے کینسر کا علاج مفت کیا جا رہا ہے۔ جناح اسپتال کے سائبر نائف سینٹر میں صوبہ بھر کے 45 فیصد مریض جبکہ دیگر صوبوں 
اور 14 سے زائد ممالک کے مریض بھی علاج کے لیے آتے ہیں۔ انھوں نے کہا کہ سائبر نائف کے علاوہ یہاں پیٹ اسکین اور ٹومو تھراپی کی سہولت بھی موجود ہے۔ ترجمان سندھ حکومت گھنور اسران نے کہا کہ یہ منصوبہ چیئرمین پاکستان پیپلز پارٹی بلاول بھٹو زرداری کے نظریے کے تحت عمل میں لایا گیا ہے۔پبلک پرائیویٹ پارٹنرشپ کے ذریعے صحت سمیت دیگر محکموں میں کام کیا جا رہا ہے۔ انھوں نے کہا کہ آج سائبر نائف شعبہ میں ہم نے ساؤتھ افریقہ سے آئے ایک مریض سے بھی ملاقات کی ہے۔ پروفیسر ڈاکٹر طارق محمود نے میڈیا کو بتایا کہ سائبر نائف دماغی کینسر اور پروسٹیٹ کینسر کا 100 فیصد علاج فراہم کرنے کی صلاحیت رکھتا ہے جبکہ منہ کے کینسر کے 35 فیصد کیسز یہاں رجسٹر ہو رہے ہیں۔ سائبر نائف سے علاج ممکن ہے یہ بڑی کامیابی ہے جبکہ یہاں ایک مریض جنوبی افریقہ کا بھی داخل ہوا ہے۔ انھوں نے کہا کہ اسپتال میں اس وقت 1498 ملازمین ہیں اسپتال میں 100 ایف سی پی ایس ڈاکٹرز موجود ہیں جبکہ مزید 570 ڈاکٹرز شامل کیے جائیں گے اور 500 سے زائد بستروں کا اضافہ کیا جائے گا۔
ہینڈ آؤٹ نمبر 86۔۔۔
