رورل کمیونٹی ڈویلپمنٹ سوسائٹی (آر سی ڈی ایس) اور ویلٹ ہنگر ہلفی کے اشتراک سے عوام کو اسموگ کے منفی اثرات کے بارے میں آگاہی فراہم کرنے اور اس کے اثرات کو کم کرنے کے لیے حفاظتی اقدامات کو فروغ دینے کے لئے ایک واک کا انعقاد کیا گیا۔
اس موقع پر واک کے شرکاء کو اسموگ سے نپٹنے کے لئے احتیاطی تدابیر والے پمفلٹ اور دیگر معلوماتی مواد بھی فراہم کیا گیا ۔ شرکاء نے اسموگ کے خلاف حفاظتی اقدامات کی اہمیت پر زور دینے والے پیغامات کے ساتھ پلے کارڈز اور بینرز بھی اٹھائے ہوئے تھے ۔وال میں اسموگ کے بحران سے نمٹنے اور صحت مند ماحول کو فروغ دینے کے لیے متحد کوشش کی ضرورت پر زور دیا گیا ۔
آر سی ڈی ایس کے بانی اور ڈائریکٹر محمد مرتضی کھوکھر نے اس مسئلے کو حل کرنے کی فوری ضرورت پر روشنی ڈالی ۔ “اسموگ کی وجہ سے ہماری صحت اور ماحول کو بہت زیادہ نقصان پہنچ رہا ہے ۔ اب وقت آگیا ہے کہ ہم مختلف جامع حکمت عملی کے ذریعےاس کے اثرات کو کم سے کم کریں اور اس کے بارے عوام میں شعور پیدا کریں ۔ انہوں نے پنجاب میں ، اورخاص طور پر لاہور میں اسموگ کی وجہ بننے والے مختلف عوامل جیساکہ صنعتی اخراج ، گاڑیوں کا دھواں ، فصلوں کی باقیات کو جلانے کے عمل کو کنٹرول کرنے پر زور دیا۔ انہوں نے کہا کہ ہمیں اسے ایک اجتماعی مسئلے کے طور پر دیکھنا چاہیے جس کے لیے مشترکہ وژن اور ذمہ داری کی ضرورت ہے۔ انہوں نے مزید کہا کہ ہم میں سے ہر ایک کو اپنے ماحول کو برقرار رکھنے اور اس کی حفاظت کے لیے مزید درخت لگا کر اپنا کردار ادا کرنا چاہیے ۔
اس واک میں میڈیا نمائندوں، سول سوسائٹی کی تنظیموں ، طلباء ، تعلیمی اداروں ، قانون نافذ کرنے والے اداروں ، وکلاء اور زندگی کے تمام شعبوں سے تعلق رکھنے والے لوگوں سمیت مختلف شعبوں کی قابل ذکر شخصیات نے شرکت کی۔
آر سی ڈی ایس اور ویلٹ ہنگر ہلفی کے درمیان اشتراک کا مقصد پنجاب کے لوگوں کے صاف ستھرے اور صحت مند مستقبل کو یقینی بناتے ہوئے اسموگ سے نمٹنے کے لیے شعور پیدا کرنے اور عملی حل پر عمل درآمد کے لیے اپنی کوششیں جاری رکھنا ہے ۔
