برآمد غیر قانونی و غیر رجسٹرڈ ادویات ضابطے کی کاروائی کے بعد محکمہ ڈرگز کنٹرول اتھارٹی سندھ کے سپرد کردی گئی ہیں، مکیش کمار چاولہ
صوبائی وزیر ایکسائز، ٹیکسیشن اینڈ نارکوٹکس کنٹرول سندھ مکیش کمار چاولہ کی میڈیا بریفنگ
کراچی 07 جنوری۔محکمہ نارکوٹکس کنٹرول سندھ نے اب تک کی بڑی کاروائی کرتے ہوئے اربوں روپے مالیت 36 لاکھ غیرقانونی و غیر رجسٹرڈ پین کلر گولیاں (ٹیبلیٹس) برآمد کرکے دو ملزمان کو گرفتار کرلیا ہے۔ صوبائی وزیر ایکسائز، ٹیکسیشن اینڈ نارکوٹکس کنٹرول سندھ مکیش کمار چاولہ نے منگل کے روز ڈی جی نارکوٹکس کنٹرول سندھ کے دفتر میں پرہجوم پریس کانفرنس کے دوران صحافیوں کو تفصیلات سے آگاہ کرتے ہوئے بتایا کہ حالیہ کاروائی دو روز قبل سسی ٹول پلازہ کے قریب اسنیپ چیکنگ کے دوران پیش آئی۔ صوبائی وزیر مکیش کمار چاولہ نے بتایا کہ محکمہ نارکوٹکس کنٹرول سندھ کی ٹیمیں صوبے بھر کے مختلف مقامات پر منشیات فروشوں کے خلاف متحرک ہیں جبکہ حالیہ کاروائی بھی اسی سلسلے کی کڑی ہے۔ انھوں نے کہا کہ ابتدائی طور پر غیر قانونی و غیر رجسٹرڈ ادویات سے بھری گاڑی کو قبضے میں لے کر تمام قانونی تقاضے مکمل کیے گئے اور ٹیبلیٹس کا پہلے لیبارٹری ٹیسٹ کروایا گیا جس کی رپورٹس سے یہ بات واضح ہوئی کہ برآمد کی گئی ادویات سے بڑی تعداد میں آئس کرسٹل اور کوکین بھی تیار کی جاسکتی تھی۔ صوبائی وزیر مکیش کمار چاولہ نے کہا کہ ضبط کی گئی غیر قانونی ادویات کورنگی میں قائم گودام میں منتقل کی جارہی تھیں جہاں محکمہ نارکوٹکس کنٹرول کی ٹیم نے چھاپہ مارا تاہم گودام میں موجود ادوایات چھاپے سے قبل ہی ہٹا دی گئی تھیں۔ مکیش کمار چاولہ نے کہا کہ ابتدائی طور پر ادویات کی پیکنگ سے بظاہر لگتا ہے ادویات پورٹ کے ذریعے اسمگل کی گئی ہیں اور ادویات کو بیرون ملک اسمگل کیا جانا تھا تاہم اس حوالے سے دیگر انٹیلیجنس ایجنسیوں کے ساتھ مزید تحقیقات جاری ہیں اور مختلف مقامات پر چھاپے بھی مارے جارہے ہیں۔ صوبائی وزیر مکیش کمار چاولہ نے حالیہ کاروائی میں دیگر انٹیلیجنس اداروں کی جانب سے تعاون پر انکا شکریہ بھی ادا کیا۔ مکیش کمار چاولہ نے کہا کہ محکمہ نارکوٹکس کنٹرول سندھ نے ضابطے کی کاروائی کے بعد مزید کاروائی کے لیے تمام ادویات، گاڑی اور ملزمان کو سندھ ڈرگز کنٹرول اتھارٹی کے حکام کے سپرد کردیا ہے۔ مکیش کمار چاولہ نے کاروائی انجام دینے والی ٹیم کو شاباش دی اور کہا کہ وہ انکے انعام کے لیے وزیر اعلی سندھ سے درخواست کریں گے۔ انھوں نے کہا کہ صوبے کے تمام داخلی و خارجی راستوں کی نگرانی مزید سخت کردی گئی ہے جبکہ شہروں کے اندرونی راستوں پر اسنیپ چیکنگ اور خفیہ معلومات کے نیٹ ورک کو بھی بڑھا دیا گیا ہے۔ انھوں نے کہا کہ ہمارا عزم صوبے کو منشیات اور منشیات فروشوں سے پاک کرنا ہے لہذا منشیات فروشوں کے خلاف بھرپور و مؤثر کاروائیاں جاری رہیں گی۔ اس موقع پر سیکریٹری ایکسائز، ٹیکسیشن و نارکوٹکس کنٹرول سندھ محمد سلیم راجپوت، سندھ ڈرگز کنٹرول اتھارٹی کے سینئر ڈرگز انسپکٹر ملیر طاہر خانزادہ، سینئر ڈرگز انسپکٹر ساؤتھ ساجد میمن و دیگر بھی موجود تھے۔
ہینڈآؤٹ نمبر 22۔۔۔ایس اے بی
