6 جنوری 2025
راولپنڈی
مرکزی تنظیم تاجران کنٹونمنٹ رجسٹرڈ کے صدر زاہد بختاوری نے کہا کہ کینٹ میں معاشی سرگرمیوں کو بڑھانے،پارکنگ کے مسائل پر قابوپانے اور خریداری کےلئے آنیوالے شہریوں بالخصوص سینئر سٹیزنز اور فیملیز کو بہتر سہولیات کی فراہمی کےلئے جاری ترقیاتی اقدامات و پرا جیکٹس کو قدر کی نگاہ سے دیکھتے ہیں،کاروباری مراکز میں آ نیوالے شہریوں کو پارکنگ اور تاجر برادری کو درپیش مسائل افہام تفہیم اور مذاکرات سے ہی حل ہونگے۔
ان خیالات کا اظہار مرکزی تنظیم تاجران کنٹونمنٹ رجسٹرڈ کے وفد اور کینٹ بورڈ کے ایڈیشنل کنٹونمنٹ ایگزیکٹو آفیسر حیدر شجاع اور سیکریڑی کنٹونمنٹ محمد رشید ثاقب کی ملاقات میں کیا گیا۔ زاہد بختاوری کی سربراہی میں وفد میں شیخ عنایت اللہ ، رفیق بھاٹیہ اور دیگر عہدیدار شامل تھے، اس موقع پر زاہد بختاوری نے موقف واضع کرتے ہوئے کہا کہ کینٹ میں پہلے دو فیز مکمل ہو چکے ہیں ، فیز تھری اور فور اپنی تکمیل کے آخری مراحل میں ہیں اور گذشتہ دسمبر میں سٹیشن کمانڈر اور کنٹونمنٹ ایگزیکٹو آفیسر سے کینٹ کی تاجر تنظیموں کے دونوں دھڑوں کی مشترکہ میٹنگ میں کئے گئے متفقہ فیصلوں کے مطابق پہلے بینک روڈ کی بیوٹیفیکشنز۔ انڈر گراونڈ کیبلنگ و دیگر ترقیاتی مکمل ہونے کے بعد تاجربرادری اور شہریوں کو پیدل خریداری و پارکنگ و دیگر در پیش مسائل کو حل کرنے کے عہد پر مرکزی تنظیم تاجران کنٹونمنٹ رجسٹرڈ قائم ہے، تمام تاجر تنظیموں کا مقصد تاجروں اور خریداری کیلئے آنے والے افراد کے حقوق کا تحفظ ہے۔ انہوں نے مزید کہا کہ کینٹ کی تاریخ میںحالیہ اربوں روپے کے جاری ترقیاتی پراجیکٹس کی نظیر نہیں ملتی۔ میٹنگ میں کینٹ بورڈ کے ایڈیشنل کنٹونمنٹ ایگزیکٹو آفیسر حیدر شجاع نے تشویش کا اظہار کرتے ہوئے کہا کہ کہ احتجاج سے صورتحال خراب اور منصوبے کی تکمیل میں رکاوٹ پیدا ہو نے سے مشکلات میں مزید اضافہ ہو گا لہذا ہم تمام تاجروں سے گزارش کرتے ہیں کہ ترقیاتی کام کو بر وقت مکمل ہونے دیں انہوں نے مزید کہا کہ ما ہ مئی میں کینٹ میں جاری تمام ترقیاتی کام مکمل ہو جائینگے اور ہم یہ یقین دلاتے ہیںگزشتہ مشترکہ میٹنگ میں کئے گئے متفقہ فیصلوں کے مطابق کینٹ کی بالخصوص بینک روڈ کی تاجر برادری کو درپیش تمام مسائل کو باہمی مذاکرات اورافہام و تفہیم سے حل کیا جائیگا۔
